車路士遠征慕尼黑，在慕尼黑球場與拜仁慕尼黑爭奪歐聯冠軍，客觀情況當然有利拜仁，起碼有主場球迷歡呼之利，但車路士領隊迪馬提奧事前雖然承認呢點，但指出一點，爭奪歐聯冠軍咁重要嘅賽事，在主場舉行，拜仁球員有非勝不可嘅壓力，反而對車路士有微利！
賽前左丁山認為車路士可以贏得冠軍，兼且賠率有4.65倍咁吸引，梗係落注啦，更加多一條二串一，車路士與韋斯咸勝，於是星期六日去完馬場即刻返屋企小睡，晚飯後十點鐘就睇波，韋斯咸苦戰取勝，臨完場幾分鐘奠定勝局，二比一贏波，來季升上英超。嘩，叫糊，立即上床瞓多兩個鐘，星期日凌晨二時半就起身睇歐聯終極決戰。
唉，諗唔到車仔竟然將拜仁當係巴塞咁對付，一味死守，任由拜仁狂攻，大丈夫話過唔出就唔出，於是拜仁佔盡優勢，㩒住嚟踢。迪馬提奧駛唔駛咁保守呀？多蒙特都可以攻入拜仁五球啦！但拜仁又唔知係唔係緊張得滯，前鋒射門全部彎晒，一一浪費機會，打到八十二分鐘左右先至靠梅拿頂入一球，拜仁教練以為贏梗，立即調走梅拿，換入中場守衞，車仔同時放出費托，費托有啲活力噃，八十六分鐘左右就博到全場九十分鐘唯一嘅角球，馬達斬出，杜奧巴全場得一個機會就一頂入網，打成平手。左丁山嘅波纜自然斷晒，又係輸錢收場。
小YY與老公計正時間去咗慕尼黑，但事前於網上買唔到門票，只能在廣場酒吧睇波，拜仁加時後射十二碼，本以為贏梗（德國人極少極少射失十二碼嘅），點知足球上帝幫助車路士，搶走冠軍，左丁山急忙viber小YY叫佢唔好得失德國球迷，因住俾人潑啤酒！點知德國人真係有秩序規律到得人驚，BBC足球現場評論話德國人第一時間離開beergarden，返屋企咯，絕不在街上鬧事，慕尼黑啲酒吧生意呢晚真係損失慘重！車路士捧盃，一如左丁山所料，純粹靠運氣與團隊精神（守得好嚴密）啫，技術就欠奉，阿巴莫域治重金請領隊，要求踢悅目足球，兼奪得歐聯，勢估唔到，一位看守教練就憑負面足球（死守突擊）為佢達成願望，油王會唔會高興呢？以後仲要唔要求車仔踢悅目足球呀？