耀萊（970）喺中國代理勞斯萊斯、林寶堅尼同賓利呢啲超級名車，借殼歷史近4年，業績唔錯，有大行分析員cover，有名牌基金入股，但投資界對佢嘅戒心卻一直無消除過。最近公司向大股東收購資產，要攞清洗豁免但失敗，一復牌仲要暴瀉，更令人感到奇奇怪怪。
耀萊一直令人放心不下，海迪覺得係同公司背後大股東綦建虹太神秘有關。據講呢位主理銷售業務嘅綦總，無出席過任何投資界場合，基金同分析員想見佢都無得見。搞到基金界最後要向其他零售公司老闆打聽呢個人。同行稱呼佢為「小綦」，話n年前Burberry進軍中國，都係「小綦」搭路，聞說佢仲有一張富豪名單，係搞privatesale嘅致勝關鍵。
耀萊最大客源，聽講係一班礦主，曾經有芬佬跟耀萊去拜訪貴客，去到礦場就見到有一堆林寶堅尼喺度晒太陽，原來係礦主唔知跑車只可以行平路，拎去礦場跑咪搞到底盤花曬兼壞埋，可見呢班暴發戶嘅威力。不過近年水緊，礦主生意經營亦大不如前；所以單以基本面睇，耀萊銷售今年都一定有影響，投資者要留意。