「鑽石之王」GraffDiamonds（格拉夫珠寶，1306）噚日終於開始上市路演，叫得鑽石之王，當然唔少得令好多女士發狂嘅寶石啦，噚日佢哋專登安排咗四個靚靚model，展示牛眼咁大粒嘅鑽石首飾，唔好講笑，每個靚女身上嘅鑽石，加埋足足都有成100卡，價值不菲。
彩色招股文件夠架勢
咁大粒鑽石，保安當然嚴密啦。不過，主席格拉夫（LaurenceGraff）似乎都唔係太放心，要親自監場實啲石。包括華華在內嘅一眾記者朋友，就見證到主席嘅金睛火眼，全程望住班靚女……條鏈，真係名副其實目不轉睛。噚日唔見主席嘅太座出現，有理由相信，主席睇得咁入神，應該真係奉旨「石」㗎咋，不過視覺上，又真係似女多啲囉。
講番啲石，據近距離睇過嘅基金經理同華華講，真係好閃㗎，但可能佢係男人啦，只係不停咁諗到底條鏈要幾多錢，真係心無旁騖。
除咗價值連城嘅鑽飾，格拉夫嘅招股文件都好厲害，因為佢個封面係彩色嘅。點解彩色厲害？因為從來呢啲用完即棄嘅初步招股文件，慳得就慳，只會係白色底印上紅黑兩色嘅字體，真係未見過彩色封面精印。王者果然係王者。
李華華
mailto:[email protected]
