澳門賭場正互相廝殺，但即使喺柬埔寨一枝獨秀嘅金界控股（3918）都要做嘢，買咗20架按摩豪華巴士嚟接客，銳意擴大嚟自越南嘅旅客。金界行政總裁曾立強同華華講，家最大客源來自越南，已經使咗成300萬美金搞豪華巴士，原來巴士內有按摩椅、電視同洗手間等設施，仲出埋旅遊自由行套票，如果搞得好，計劃再買多30架巴士，話要將越南客比例由40%擴大到50至60%。
華華坐過架豪華巴，真係全程好似坐喺osim咁。首席財務總監李維德同華華講，過往推廣費用約100萬美元，今次不惜工本，將費用增多一倍至200萬。除咗豪華巴，今年7月仲有幾間名店開張，包括Rolex、Cartier同伯爵，係柬埔寨首間大型名店城。總之要搞到個場夠晒high。
歐洲債務危機衝擊各行各業，李維德就唔怕金蛋會倒下，佢話：「澳門賭業都冇乜受到影響啦，鍾意賭嘅人，有錢時賭多啲，冇錢時咪賭少啲囉。」