一位讀者Arthur來郵，指本欄於五月十三日講「公立私立」大學，指史丹福出產更多創業奇才，柏克萊與UCLA則無，並不公平，因為哈佛、牛津、劍橋都唔係有好多創業成功學生嘅呢。不過咁，哈佛二十五年前有蓋茨，現在有朱克伯格，足以威震天下咯。本欄文字搵UCLA與柏克萊嚟與史丹福相比，別無他意，純粹因為當日有一位自UCLA畢業嘅基金經理（日本人）向一位柏克萊校友（美國科技基金經理）詢問而已，或有感而發啫。肥仔K曾在三藩市灣區及矽谷地區居住兩年半有多，不時與同學揸車去Cupertino（蘋果），Sunnyvale（雅虎），SanJose（CISCO）等地「朝聖」，一位世叔在PaloAlto史丹福大學附近嘅生物科技投資公司工作，向肥仔K提示在矽谷周圍都可以碰到科技鬼才，三十歲億萬富豪，叫佢地唔好得失任何人。矽谷創業氣氛如此濃厚，史丹福學生耳濡目染，創業傾向更係比柏克萊學生強烈好多嘅。
科技創業成功，與見識，文化（社會活潑開放，接受失敗），金錢（創業投資基金成行成市）以及管理能力有關，缺一不可，得把口，得個野心係冇用嘅。矽谷經過三十幾年開發，積累大量人才與經驗，故此朱克伯格離開哈佛，要走去矽谷創業，不留在東岸。
創業與文化有甚麼關係？有㗎，歐洲日本學生如果有蓋茨、朱克伯格嘅志願與才華，如果對家人講佢地會離開相等於哈佛嘅大學而走去創業，多數會俾父母鬧餐死先，日本學生更可能會俾阿爸打完一巴掌，乖乖地返回東大或應大。
候任特首搞新意思，要設立一個科技及通訊局，希望發展香港科技，仲傳出由台灣過嚟嘅楊偉雄做局長。新人物是否會帶來新作風？香港青年人因而熱衷科技創業？都係唔好信住，香港雖有創業風氣，但十二年前科網股爆破，揭示咗不少本地年青人創辦嘅網站，管理一塌糊塗，全憑心口寫個勇字。今天嘅情形是否會好啲？左丁山唔知，但有一樣知道得幾清楚，香港特區政府「科技及通訊局」官員肯定唔識唔敢唔會pickthewinner！