我求大俠朝朝都起身睇NBA，一播廣告嗰陣就肯定聽到克勤哥係咁唱「怒射出火」。唔係！全句應該係「怒射出火燄，額頭流熱血」先啱。我原本對首歌都冇乜大感覺，但經過呢幾個月嘅「洗腦」，家都唱得出兩句。喺現在台嘅洗腦式宣傳下，原來唔少歐洲球迷上網都睇過套MV，但差唔多睇親都踩，話MV令人諗起二次世界大戰。
羅馬競技場大笨鐘被炸
為咗大搞歐國盃，現在台搵咗李克勤唱主題曲，首歌叫做《決戰草原》，仲用電腦特技整咗個MV，相當揼本。MV入面，炮火連天，視覺效果一流，坦克車、轟炸機、火箭炮同機關槍乜武器都出齊，打到砰砰聲；成個歐洲都被戰火破壞到頹垣敗瓦，羅馬競技場爛熔熔，英國大笨鐘仲俾人炸爆埋。原本2012歐國盃宣傳，搞到好似2012世界末日預告咁。
英國網站www.101greatgoals.com就轉載呢個MV，當地球迷睇見自己家園盡毀就好唔滿意：「簡直噁心！究竟佢想講乜嘢！足球唔係戰爭，我喺歐洲睇到呢條片，簡直O晒嘴。」不過，我求大俠就覺得，套MV都係將歐洲足球大戰誇張化，無意重提二次大戰嘅，歐洲球迷又唔使咁緊張，畀創作多啲包容啦。
擬用戰爭帶出比賽刺激
nowSports頻道副總裁賴汝正回應，強調MV絕無影射二次大戰。佢話：「我同克勤都好錯愕！首歌嘅概念係克勤諗，想用戰爭嚟帶出比賽嘅刺激性，成個MV嘅故事都係虛構，同二次大戰無關。」
另外，現在台仲將班講波佬漫畫化，化身球員，包括「金猴孖寶」大哥瑜同曾偉忠粉墨登場，同克勤哥做隊友。有外國球迷講笑話：「套MV有個問題，歐國盃入面冇中國球員㗎喎，咁算唔算呃人呢！」