華華聽聞，原來之前講咗最快5月中走人嘅思捷（330）大掌櫃周福安，由於新財務總裁（CFO）鄧永鏞經已返咗工，工作交接亦好順利，所以周福安已經提前喺今個月初離開公司喇。
新CFO交接順利
其實思捷上月中已經宣佈，周生會喺5月1號辭去公司執行董事及CFO職務，但會留駐公司直到5月中以確保順利交接，最後僱用日期係6月1日。福安雖然只係喺思捷做咗三年，但由於佢份人易話為，人緣又好，聽講話公司好多人都唔捨得佢，個個都想同佢farewell，結果就要分幾日搞先至搞得晒。至於新動向，福安話暫時會去旅行，返來先再算。
福安喺思捷嘅三年，都可以算係集團近十年嘅低潮，股價曾經跌到落去9蚊，更不停被人質疑公司嘅發展策略，不過點都好，呢啲都已經過去，華華亦借呢個機會祝佢前程似錦，希望好快可以再見到佢啦！