與其消極認為潘源良導演的電影屢戰屢敗，倒不如說他屢敗屢戰來得積極。身兼填詞人、球評家及導演，所拍的電影遠不如他講波激情，亦未及他填的詞多元化，既有《十個救火的少年》寓意深遠，又有《最愛》柔情委婉。潘源良表示世人只會記起兩種導演，一是拍出傑作，另一是差得沒譜的，自己兩者皆不是。最緊要足球是圓的，一日未吹雞完場，比賽仍然繼續，工作、愛情亦如是。 撰文：何永寧
上映日期：6月底
早前在潘源良位於油麻地的蝸居兼辦公室做訪問，未談他的新作《影子愛人》，身為球迷自然不可不談他評述過的足球，特別是2010年一場世界盃淘汰賽英格蘭對德國，當林柏特的入球被判無效時，他的反應比買了成副身家的球迷還大，大喝猛叫了超過三次「入咗」，自此被高登仔封為神級講波佬，但亦有人投訴家中電視的喇叭因此被嗌爆。
評《那些年》唔合理
潘源良利益伸報自言從不買波，他說：「我從來都唔賭波，十蚊都冇買過，反應大係因為好相信自己第一個判斷，球波係入咗。講波同拍戲、作詞一樣，有齊晒料，戲劇性係睇個創作人點爆出嚟，當時我可以不求有功，但求冇錯咁話『咦？球波好似入咗喎，等我哋睇番個慢鏡先』，效果完全唔同，所以我會覺得自己嘅身份係創作人，講波都係。」
身為球評人沒有偏愛任何一隊球隊，就如沒有賭波一樣追求獨立性，可以講得更放更肆無忌憚。對於電影潘源良自言亦很商業，只是希望商業得來合理，他以具體的事例來解釋何謂合理：「我嘅電影從來都商業，床戲、錫戲我都會拍，但要合乎情節推進，好似《那些年》夠商業，但佢有情節唔合理，柯震東喺班房打完手槍，你做訓導主任仲點會調佢坐喺陳妍希前邊睇住佢呀，唔通叫個女生睇住佢打手槍呀，呢幕咪係噱頭橋，我覺得唔合理接受唔到。」
在票房論英雄的現實世界中，潘源良認為世上只有兩種導演會令觀眾記住，他說：「一係拍到部傑作出嚟係人都記得，我未有。一係好差，好在我亦都未係。你要拍飛車打鬥我自問拍唔到，但至少如果有投資人想拍部女性本位，描寫心理較細膩嘅電影，都會諗起我，呢方面我仲有市場。」他笑言可以拍出一部既有市場又賞心的電影，是每個導演夢寐以求，但球賽一日未完，難保不像今屆曼城在英超憑最後3分鐘捧走個冠軍。
辦公室貼珍妹海報
相對事業，在愛情路上跟李麗珍兜轉廿多年的情路似乎開花結果，對於過往在潘源良口中少提為妙的珍妹，今日答得俐落，雖然未致於他講波般豪情還帶點靦腆，他覺得結婚不結婚已經變得不再重要，他說：「唔想俾任何人有壓力，亦冇特別去想。」不過在辦公室的不當眼處就貼了一張珍妹的海報，他解釋說：「張海報我搵人幫李麗珍做，所以佢送張俾我。」
《最愛》寫出心底話
一直流傳《最愛》的歌詞是潘源良的寫照，廿多年前他執導《戀愛季節》時跟李麗珍陷入苦戀，特別歌詞中提到「別了她原為了你，留住愛亦留住罪……」，當事人只以寫得很投入來形容，他說：「有幾多講自己，真係分解唔到，總之好投入。」
至於潘源良近作《影子愛人》拍攝時女主角張栢芝受離婚困擾，近幾部演出的電影票房一浪低於一浪，加上電影播影時正值歐洲國家盃打進高潮，令人擔心票房受到影響，潘源良自言會以平常心看待：「票房從來都係最難估，不過天地良心我想講番栢芝真係好專業，只係其間請過兩、三日假，佢一到現場就交出水準，呢樣真係我想講，假如事件發生喺我身上，我未必可以好似栢芝處理得咁好。」
劇情簡介：年輕總裁愛上替身
新片《影子愛人》講述賣花姑娘秦芯（張栢芝飾）從來沒有想到，自己會和柯氏集團突然失蹤的繼承人Paris（張栢芝飾）長得一模一樣，為此柯氏集團的行政總裁權正薰（權相佑飾）利用這位替身在公司主持大局，防止大權落入別人手中。
秦芯搬進了柯家大宅，在權正熏的指導下，秦芯努力扮演Paris。權正薰本來以為秦芯是個見錢開眼的女人，本應是一場荒誕的交易，他們都沒有想到自己會在這盤逢場作戲的賭局中禁不住相戀相愛。而一心想篡奪Paris繼承權的董傲年卻伺機行動，企圖揭穿秦芯的假面目。變身Paris的秦芯面臨多重考驗，當她面對權正薰想努力追求幸福時，真的Paris卻又出現了……
