陳慧琳（Kelly）自誕下細仔劉琛（小龍包）後，前晚首次出席公開活動。經常會為愛子充當攝影師的Kelly，表示兩名囝囝近日冲凉時，經常為兩人拍裸照，更笑指小龍包現時重達13磅，肥嘟嘟很像一個波。
陳慧琳前晚在中環擔任時裝品牌IsabelMarant新店開幕嘉賓，是她誕下細仔劉琛後首次出席公開活動，同場還有何超雲及徐濠縈等。休息了兩個多月的Kelly，透露小龍包現時重13磅：「我仲餵緊人奶，諗住餵到要出埠工作先停，但因為餵緊人奶關係，所以暫時未可以減肥。」
蝦餃仔爭寵
Kelly坦言未有再生小寶寶的計劃，並自爆現時在家中經常會為兩位囝囝拍裸照：「小龍包大食過蝦餃仔（大仔劉昇），小龍包家重13磅，好似個波咁，家成日會趁佢哋冲凉時幫佢哋影相。」問蝦餃仔可會呷弟弟醋？她說：「如果我哋同小龍包玩得耐，蝦餃仔都會走過嚟要我哋陪佢，但有時哥哥都會同細佬玩。」
早前Kelly曾笑言要跟劉德華的小龍女對親家，前晚問Kelly是否已探望剛出世的未來媳婦？她說：「我已經恭喜咗華仔，送咗啲BB用品畀佢，但仲未探得住，家全世界都想睇相，我都未睇過。」逐漸復工的Kelly，稍後將會錄唱片及拍廣告，但由於已有兩名囝囝，故只會接一、兩天出埠的工作。
超雲信山聰
同場的何超雲透露近日正計劃開網上時裝店，她又指剛過去的母親節於家中度過：「爸爸都過咗嚟同媽咪慶祝，當晚山聰都喺度。」說到近日有男藝人曾被迫拍裸照，問超雲會否問男友陳山聰可曾拍過？她說：「我近排只留意時裝，今晚返去會打畀佢問吓，但我信佢冇影過。」
採訪：顏英儀 攝影：黃偉雄