【第65屆康城影展之貪快出事】李冰冰喺康城都係出名嘅內地演員，所以佢經常一晚走幾場，前晚佢先去華誼兄弟個派對，匆匆逗留咗幾分鐘就趕住去行紅地毯，着住長裙高踭鞋着得斯文靚靚嘅佢，離開會場時可能諗住走捷徑會快啲，於是揀咗喺柱邊個窄位走，點知因為條罅太窄，冰冰成個人攝咗喺條罅中間，場面都幾尷尬，好彩佢身邊啲人眼明手快，好快就幫佢脫離窘境。
成龍嗒陳妍希糖
另一邊廂，台灣女星陳妍希、鄭元暢等又出席咗台灣電影之夜嘅派對，成龍去完華誼個派對都有趕嚟，司儀猛叫娶咗林鳳嬌嘅成龍做台灣女婿，佢就賣口乖講笑話最好有導演搵佢拍愛情片，希望九把刀搵佢拍《那些年，我們一起追的男孩》，席間佢又對女神陳妍希特別照顧，讚女神係東南亞最紅女星之餘，連大合照都叫陳妍希企喺佢旁邊，當然扶女神上上落落不在話下，攞啲紳士風度嚟獻吓殷勤。
此外，余文樂、阮經天同黃曉明主演嘅《血滴子》，噚日喺康城宣佈，會喺12月20日上映，由於有人話12月21日係世界末日，所以樂仔、曉明都笑住話要喺末日前睇戲狂歡。