記得舊年8月初，歐債危機燒到埋身，淡友發動一場「六日戰爭」，恒指6日最多跌3795點，最後一個急跌交易日，9RSI跌到去12.9收市，同日期指就跌到去15.3，之後港股再喺短短幾個交易日之內，大幅反彈最多1636點。第一浸反彈，幅度略多於黃金比率0.382倍。
睇番上周五收市，恒指9RSI跌到去18.7，但期指9RSI就跌到去16.9，反映現階段市場恐慌程度，拍得住舊年8月初。如果睇過去TrackRecord，就知道每次股市急跌之後，超賣反彈一定會出現，舊年8月、金融海嘯、97年金融危機都唔例外，晉佳認為呢種市場慣性會一再重複，家市況已經符合反彈條件，就算唔博反彈，至少唔應該喺呢個位造淡。
至於今次跌浪（假設跌浪完成），恒指最多下跌咗2687點，以黃金比率0.382倍計算，保守估計短線有條件由低位反彈1000點左右，即係恒指可以升番去19600水平。前幾日恒指跌穿擴散三角形支持線（現延伸至19500）之後，出現後抽輕微突破番支持線都算合理，所以首個反彈目標就定喺19600。去到19600，就可以耐心尋找下次造淡嘅機會，由於擴散三角形反映嘅凶兆仲未出現，所以反彈過後嘅跌浪，一定比今次更勁。
短炒大路股 逢高減持
雖然晉佳睇淡中線後市，但係睇埋可靠嘅超賣指標，始終相信港股會出現死貓彈。呢點好多人都估到，但係你有冇信心博反彈先？
晉佳覺得，博呢種死亡反彈嘅先決條件，就係假設你現價買入股份，即使再跌，都有信心見底反彈嘅力度，會令手上持股至少升番去買入價，令自己立於不敗之地。如果配合嚴重超賣嘅技術指標去運作，呢種博反彈嘅模式其實幾安全。
博死亡反彈，要買啲包跟大市走嘅股份，所以買大路股就算數，其中，反彈浪包冇走雞、波幅又夠大嘅有中國建材（3323）、恒大地產（3333），穩陣嘅就有內銀股。
中建材上星期五強勢倒升，要博番上9.50元樓上唔難。正如上述分析，持有呢類股份幾個交易日，然後逢高減持，咁博反彈都未嘗不可。
晉佳
本欄逢周一、三及五刊出