拖鞋股寶峰時尚（1121）近年為咗谷起品牌知名度，不斷加大宣傳費用，除咗之前贊助亞洲小姐，啱啱仲贊助咗台灣爆紅組合五月天喺福建泉州嘅演唱會。五月天咁多fans，好多經銷商都慕名而來，順便參加寶峰前日開始嘅秋冬季訂貨會，有經銷商同華華講，以前賣開體育服裝，但家市道唔好，賣凉鞋仲好賺！
體育股睇怕冇運行
華華前日參觀寶峰嘅訂貨會，來自廣州嘅分銷商李小姐話，兩年前有同李寧（2331）同安踏（2020）訂貨，但舊年已經冇訂，因為體育服裝真係做唔掂，成日要用成本價甚至蝕本價散貨。
河南嘅惠小姐就話，今年第一次嚟睇寶峰嘅貨，覺得凉鞋市場有得做，咁有冇賣體育服裝？佢就耍手擰頭話：「那裏賺得到？」來自新疆嘅傅先生都話：「新疆人很喜歡潮流，凉鞋很新鮮，但如果體育衣服，我選擇adidas也不選本地牌子。」咁多分銷商嫌棄運動裝，睇怕體育股今年都冇乜運行囉！