公司年報除咗資料多，可以畀投資者研究公司價值之外，對公司管理層嚟講，最怕相信應該係要公開自己嘅人工，搵得多俾人話，加得多亦俾人鬧。但係好似瑞安建業（983）CEO黃勤道（Philip）要申寃，就真係比較少見。
唔認加薪 原來係花紅
話說瑞安上個月出咗年報，華華赫見Philip舊年人工加咗成34%，佢哋個三年大計啱啱舊年先公佈，都未知成效係點，人工就大嗱嗱加咗成400萬，總數有成1421.8萬，真係未達標，先興奮。點知Philip見到華華即刻大嗌，話舊年人工冇加咁多，「有400萬係option（認股權）嚟㗎，未行使得㗎！真係要幫我澄清吓！」
華華即刻睇番年報比較吓，真係要「澄清」一下，的而且確，Philip嘅人工部份，舊年只係加咗大概30萬，至於總薪酬多咗三成幾，並唔係因為Philip所講嘅option，係佢舊年花紅多咗成300萬。所以唔係人工多咗，係花紅多咗啫！