廣東話向來傳神，其中絕到冇朋友的一句要算係「爛泥扶唔上壁」，能精妙演繹箇中神髓的，人版一號，首選曼城泰維斯。講真，曼城戲劇性奪得今季英超錦標，成為英超20年來贏得英超的第5支球隊，本屬可喜，偏偏在曼市的勝利巡遊，泰維斯高舉「R.I.P.Fergie」（費格遜早唞）字句，連我這個非爵爺鐵粉都睇唔過眼。
我明白泰維斯心中對爵爺的怨憤，由韋斯咸借到曼聯，明明有表現，連球迷都舉牌要求簽佢，但爵爺還是放棄，他那種心情可以「我心本向明月照，奈何明月照溝渠」概括！如果泰維斯睇過吓亦舒小說，又或者聽過吓Wyman填畀李蕙敏隻「活得比你好」，應該明白到自己已經做到了向費格遜展示出「那日離棄我原是你損失」！只是那個字牌叫人搖頭低嘆，泰維斯贏得錦標，失去品格！
話晒由球迷票選的英超20年來最佳陣容，球迷目光如炬真係叫人拍爛手掌；費格遜是必然的最佳領隊，11人大軍則是，舒米高、阿當斯、尼曼查維迪、艾殊利高爾、加利尼維利、傑斯、史高斯、基斯坦奴朗拿度、謝拉特、舒利亞及亨利。11個球員，有6個都係由費格遜調教出來的曼聯球員，可見爵爺的功力。我肯定再過20年，泰維斯都不會榜上有名。
幾可肯定還有幾個人睇見張名單一定眼寃冇癮，第一個係維多莉亞，佢個心一定諗，「有乜理由連繼承佢件曼聯7號球衣的C朗都上榜，卻冇位預埋我家專用黃金右腳射香蕉罰球的碧咸？」第二個係泰利，佢本人會咁諗，「吓，連尼曼查維迪，阿當斯有份，點解冇自己份嘅？」再落嚟就係朗尼，貴為英格蘭第一射手，都要名落孫山，叫人情何以堪？
這種選舉遊戲，往往叫候選人戲假情真，越想越氣，其實退一步海闊天空，想想中國未來國家主席習近平的金句，「沒有最好，只有更好」，沒成為「最好」的球員可視自己是「更好」的那一批，會否比較釋懷？
文：盧覓雪