歐洲國家盃6月9日開鑼，聯想起希臘04年爆大冷創造神話凱旋而歸，繼而08年首圈出局，中間似乎與歐債有着千絲萬縷的關係。
點解咁講，2004年的希臘政府已經唔多掂，當年希臘奪冠獲得800萬歐元獎金，按道理這筆獎金應全數分予球員，即每人約35萬歐元。希臘足協原先只答允每人10萬歐元獎勵，其後經討價還價後，據報各球員最終只有20萬歐元。見微知著，八年前連球員獎金都要分一大筆的國家，其實早已為2010年開始叫救命埋下伏筆。
2010年歐債危機，源自希臘急於融資以支付大量到期債務，避免出現違約風險。歐盟與國基會當年5月向希臘提供總值1100億歐元貸款，但條件是希臘要嚴格執行一系列的緊縮開支措施。08年歐國盃及2010年世界盃，球隊與足協就晉級及奪冠獎金鬧得不歡而散，結果兩個頂級賽事，首圈出局勁樣衰。
2010年希臘政府攞完錢，一直沒履行當初承諾，角色就如一個衰佬向老竇老母及外家借錢還債，一方面聲淚俱下「再唔還，佢哋會殺我全家，個家（歐元區）會散」。另一方面就如其他債仔般發誓，「我下次唔會再賭，會生性做人（緊縮開支）」。結果希臘攞完錢後「完鬆」。由儉入奢易，倒轉頭，要過慣享受的希臘人節儉，好似全世界欠佢，結果當然是我行我素，繼續使大錢。
決賽貼德英大戰
古往今來，幫債仔還錢其實吃力不討好兼害了他。98年金融危機的南韓、02年破產的阿根廷及08年海嘯後的冰島，都是靠自己貨幣大貶值而重生，過程絕對痛苦。但針拮唔到肉唔知痛，希臘永遠靠人填數，其他歐豬已有樣學樣，這場危機亦沒完沒了。
今年歐國盃16隊國家，一半是歐元區成員，另一半是非歐元區。股榮統計今年各國主要股市指數、10年期債息（越高越差）及5年期CDS（越高越差），用三項指標挑出晉級及冠軍份子。
先睇A組，希臘現時CDS無人敢開價，債息28厘收到至奇，同組俄羅斯亦唔多掂，就估主辦國波蘭首名出線，捷克次名出線。B組死亡之組，歐洲資金全部湧入德債，德國首名出線無問題，荷蘭應該次名出線，葡萄牙有機會包艇。C組有三隊歐豬國，經濟數據都係衰，貼西班牙同非歐豬的克羅地亞首次名出線。D組則估法國及英國攜手出線。
八強比賽，荷蘭應該贏波蘭，四強會對住殺退西班牙的英國。另一條線，德國輕鬆擊退捷克後，準決賽可以贏到法國或克羅地亞。決賽戲碼，股榮估德國對英國，至於冠軍，噚晚歐聯決賽最後王者會畀到提示大家。
股榮