麗豐（1125）呢期插到近供股價，繼續大折讓，有得諗吓。麗豐2月公佈1供1，啱喺EGM通過咗。而呢次供股，每股供股價0.125元，麗豐現價0.129元，已經跌至挨近供股價。又就算連埋呢次供股攤薄效應反映，麗豐每股NAV都有0.624元，現價係大幅折讓79%，誇張到不得了。再講，麗豐啱今年1月底數字，投資物業總值上百億銀，佔咗總資產值65%。投資物業當中，包括上海香港廣場及廣洲五月花廣場，全部重秤噹噹聲，單係投資物業，已經夠晒墊底。又麗豐呢期供股，集資淨額9.9億銀，連埋手頭現金，應該上到22.4億銀，有足夠銀彈供日後發展。呢轉麗豐再跌，吼實0.125元個位兜轉，折讓收窄到70%，麗豐都要翻近半番到0.187元。
第一上海可兜底
第一上海（227）喺三年底部打底，現價（0.6元）嘅NAV折讓高達67%。就當個市唔醒神，集團證券業無咁快TurnAround，但都有咁大折讓墊底，冇有好怕。再講，呢期阿爺財金政策密密出招，中線嚟睇，絕對對中港股市有利，但市場反應冷淡，反而畀大家兜底機會。照兜底，第一上海翻半番到0.93元，折讓仲高達51%。
錢雋