【本報訊】富家公子劉定成（61歲）涉嫌非禮及用裸照恐嚇男藝人案續審，事主D供稱，影裸照實屬無奈，但辯方踢爆他曾在雪糕店內自行扯高上衣，大晒六舊腹肌，又收下劉送贈價值數萬元的Gucci手袋。劉定成昨日適逢生日，心情極靚，表現花枝招展，更自爆搭的士遭司機騷擾：「佢問我今日係咪着住第50條T-back！」
總督察將不會出庭
控方下周一將傳召男藝人A出庭，之後便完成控方案情，被告或會出庭自辯，此外並無其他辯方證人。換言之，早前接獲證人傳票、被揭有份拍寫真照的總督察，將不會出庭作供。
辯方大律師貝敦昨盤問時指，2008年8月11日任職模特兒及健身教練的D，與被告劉定成初次見面，兩人在雪糕店傾談了兩小時，期間D自行揭起上衣展露腹肌，但遭劉以公眾地方太張揚為由阻止。翌日D上劉家拍照，甫開始便擺出高舉雙手炫耀肌肉的姿勢。但D自言，對此沒有印象。
辯方又謂，D拍攝裸照後，劉向他贈送價值數萬元的手袋作報酬。D否認說：「佢話個袋係sponsor（贊助），我問係乜牌子，佢話係Gucci，但價錢佢冇講實，最後我冇攞到。」
昨天生日的劉定成，認為自己出門招風雨，感到掃興，要向男記者商借毛巾抹身，大呻大雨令他「冇得燭光晚餐」。他又不滿記者每日報道其衣衫價錢，令人以為他庸俗炫耀。「唔好再列晒我啲行頭出嚟啦，我日日都係咁着，唔係專登上庭先着到咁！」他直斥部份記者「搞屎棍」。
但轉頭劉又自爆早上搭的士時，司機問他是否如穿着第50條T-back？劉裝作生氣道：「我話佢都傻嘅，有冇腦㗎？我點會同一條底褲着兩日呀？你要問，都問係咪第51條啦！」
劉透露，前晚有周刊上門送花給他賀壽，「但我一攞起就瀨嘢，好似炸彈咁，入邊啲水搞到成地都係」。
他又指不清楚花的品種，有男記者問：「係咪菊花呀？」劉即怒說：「有冇搞錯呀，大吉利是，我今日生日呀！菊花？你留返拜山送啦！有冇人同我掌佢個嘴？」
有傳媒寫了一封附有報章標誌，寫上「給劉先生的信」的信件，劉拆封給其他記者拍照，問他是否「情信」，他笑謂是「恐嚇信」，又說「唔好搞埋啲老土嘢啦」！
案件編號：DCCC1072/11