亞視最近風頭咁勁，又拍騎呢三響炮，又榮登收視一點嘅大哥，無綫貴為大台，呢啖氣點啃得落先？哈！好在佢最近播啲劇集夠晒娛樂性，好唔好睇就見仁見智，但套套保證有穿崩位，間接令班觀眾更加落力搵錯處，操到個個金睛火眼，世事俾你哋看透啦！
繼《盛世仁傑》同《耀舞長安》連番出現穿崩之後，大前晚播出嘅《拳王》又有蝦碌場面。話說劇集講黃浩然飾演嘅畢弟開咗間帝國拳館，為咗隆重其事，特登call齊班記者嚟開記招，又擺晒甫士影相，幾咁架勢呀，點不知風光只係表面嚟咋！
其中一個鏡頭，就唔覺意影到兩位老臨喺跑步機度練跑嘅窘態。首先佢哋着住嘅白色「阿伯背心」已經非常搶眼，加埋佢哋嘅騎呢跑姿，寧舍覺得異相。
慳電未開機
睇真啲，原來跑步機冇開着到，條滾動帶郁都唔郁，顯示屏亦唔覺有燈着，難為兩位老臨喺跑步機上面作狀踱步，又好難交足戲啫！不過，無綫連跑步機嘅電都慳，呢方面比亞視似乎更加優勝噃。
另外，《拳王》上個禮拜又有一幕講述蕭正楠借酒澆愁，點知佢隊隊吓，支酒居然唔同咗顏色，好明顯又係道具唔連戲啦！後尾講蕭正楠自殺死，但馮仁昭懷疑佢嘅真正死因，係溝酒飲飲到死囉！
