有線靈異節目《怪談．異秀戰》早排發生參賽者「鬼強」懷疑鬼上身入院。噚日有線食住上，安排大隊包括梁思浩、岑寶兒（阿夢）同一班參賽者去荃灣浸泰式花浴，開運兼減壓。
梁思浩講開撞邪話：「撞邪驚過俾人非禮！」佢對近期藝人猛男寫真有感而發話：「好似TVB、啲唱片公司嘅新人嘅人工實在太低，點解咁多新入行嘅都肯影裸照，一百個一百個都肯，人工低咪受誘惑囉，舒淇當年都係為生活拍寫真。」梁思浩仲呼籲演藝人協會爭取最低工資，月薪一萬元：「家新人入行得個二、三千蚊，阿夢當年都要一路拍嘢一路做待應。」
阿夢時運低
阿夢之前陪鬼強入院，但噚日阿夢仲驚過鬼強：「我一向細膽，家唔止係恐怖，係恐懼，我獨居更加驚。」馮仁昭見佢周身瘀，阿夢話之前喺鑽石山拍攝時又撞鬼，有個着黃色tee嘅男鬼喺佢後面飄過，掃佢個頭。此外，《怪談》其中一位參賽者原來係09年曾參選工展小姐嘅張淨思，當年佢因為祼照流出而退選。