李香琴在圈中德高望重，人緣也好，她早前拍朱古力廣告，在球場取景時，獲契女戚美珍自動請纓親到現場打點，有星級助手侍候，琴姐寧舍有「飛士」。
琴姐表示開工前，接到契女戚美珍來電通知會到現場探班，她說：「阿戚買咗十幾盒蝦餃、燒賣同點心嚟探班，佢仲帶埋自己個助手嚟，我有星級助手梗係唔同啲。」琴姐有豐富演出經驗，加上表現精靈，當日只拍攝約六小時便收工，六位數字酬金袋袋平安。
錫身最怕搵命博
琴姐笑說：「冇咁多，我收得好平，應該收貴啲。」琴姐自爆導演要求她拍攝一幕被碰倒地上的鏡頭，為遷就便製作了一塊草地地板放在琴姐腦後借位拍攝，不過最後卻被剪掉。
問到琴姐為甚麼不在廣告上施展一下凌厲腳法，她說：「我簽約時講明，有危險動作唔做，怕整親，假嘅又唔好睇。」琴姐嚴謹的工作態度，絕對是後輩的典範。