打電話畀靚女Model約影Notebook，對方只係「哦」一聲，即係預咗無驚喜。入到蘋果大樓，望住富士通四色新機，又鮮紅又粉紅又鋼琴面，即時醒神番，不停用手機玩合照，足證女仔一樣咁好色。係囉，電腦唔係事必黑沉沉嘅，炎夏暑假一於「色」放自己啦，Baby！
記者：徐影龍
攝影：楊錦文
Model:Christie
安橋靚聲加持
富士通一口氣推出四部新機，你同我嘅着眼點唔係邊部規格勁啲、邊部抵玩啲，而係揀番隻心水顏色先。記者對又紅又紫免疫，反而愛上規格最勁嘅鋼琴黑，烏黑亮麗立立令，成熟中又帶點不羈，令我聯想起狂Sell霸王嘅成龍，不過你放心，新機全屬MIJ日本製造，唔識「動L」亦唔會爆炸。
未睇i73.1GHzCPU同高達2GBVRAM顯示卡有幾勁，單單內置安橋靚聲喇叭，已經打贏一堆手提電腦，加上DTSUltraPCIIPlus音效優化，由沉實重低音，到甜美人聲都難唔倒佢，而且輸出力度足夠，室外播歌都好清晰，恍如一部迷你Hi-Fi擺喺你面前咁好聲。
獨有磨砂機面
呢款LH532，機身邊位偏圓，拎住佢四圍走，對手仔都會舒服啲。而呢款更屬LH532特別版，獨有棗紅色設計，磨砂機殼處理更係新機中唯一一部，感覺尊貴有氣派，幾啱高級行政人員使用，喺會議桌全是黑機天下中，感覺零舍有性格。採用i72.1GHz處理器，配合Intel最新IvyBridge平台，慳電長氣，滿足晒工作狂。
抵玩高級機
其實粉紅機同鋼琴黑規格相若，一樣有NVIDIA2GBVRAM獨立顯示卡，只係換上低檔啲嘅i32.3GHzCPU，同埋Win7屬Home版本，但售價就平$4,000，對女仔嚟講，又唔係要煲《DiabloIII》，懶理CPU有幾多「擊」，最緊要賣相夠激！呢款機就肯定冧死一堆HelloKitty迷同粉紅狂，而且同樣內置安橋靚聲喇叭，播住蕭敬騰同崔始源MV曬太陽，冧上加冧。
最搶眼最筍價
可算係新Lifebook入門級，不過鮮紅色機身、五字頭機價，反而最搶眼係佢。咪睇小佢機價平一大截，規格上都有14"高清芒、750GB硬碟等貴價硬件，只係粒GPU改為Intel內置顯示晶片啫，性價比OK㗎。實用性上，備有FaceSense臉部追蹤功能，過癮之處係當你睇緊心愛電影時，人有三急又或離開聽電話，播放器識得自動暫停，唔使手忙腳亂Click鼠標搵暫停，幾體貼喎。
查詢：富士通（31012898）