賭波天天有，但今天算係本屆球季最後一個「大賽日」，先撐輕裝黑池90分鐘頂住英冠巨型班韋斯咸；尾場重頭戲捧主隊拜仁變身，殺退另一倫敦球會車仔，助本欄食個尾糊。
4年油元，打造王者曼城，實為金元足球一次顯赫勝利，有競爭才有進步，無謂憎人富貴，個個變晒左仔，各有玩法各有出路，泰仔叫阿Sir安息實在極無品；球季終結者只得一隊，最尾3隊甚至有機會落到英冠後無影無蹤，故能續留賭枱，已是身處殺戮戰場上的一種美事。等到8月中歐國盃過後奧運玩完，新球季開鑼新開始，世界已是不一樣，3紅（曼、利及阿）球迷勿太沮喪。
分餅仔時代，當然個個想分一杯羮，黑池上季同韋斯咸，以尾2同包尾齊降班，兩軍這年來各走我路，中部細會黑池淨係嗰年從電視轉播收益執4,000萬鎊；不過堅持打進攻足球嘅領隊荷路威，今季未有冲昏頭腦，輕裝上陣但補入球員大多擔正。季尾越打越好，原來老菲臘斯只係大後備奇兵，早前點過名嘅恩斯仔同菲臘仔兩隻快翼喺附加賽再證威力，固然係今場速度較慢嘅韋咸後防心腹大患；前屆決賽入過波嘅泰萊費查續任箭頭，後防連龍門5個位，有4將仍會喺今場正選。黑池係附加賽之王，從不失手，論決賽經驗，唔會差得過擂台躉韋斯咸好多，受讓可博。
韋斯咸用超聯班底打英冠，要踢附加賽實已稍為失望，今次決賽，領隊大儍艾拿迪斯，背負壓力遠比黑池大；當然班波季尾加入稍嫌獨食嘅射手華斯迪後，進攻更銳。喺偌大嘅溫布萊球場，以兩軍風格根本守無可守，開「大」可以預見。但兩場附加賽所見，韋咸進攻合作性比黑池較單調；只死球威力較強，最懼後防漏洞不少，上次對手卡城太差，該隊問題，球迷易忘。我也不太迷信兩軍對賽今季聯賽總比數，韋咸勝8:1；這支東倫敦球會要一跌即升，破數據來屆有7隊「倫敦及周邊地區」球會踢超聯，或許要戰至互射12碼也未可料。（自95/96球季英超縮減至20支參賽隊，最多只有6隊「大倫敦區」球隊參加英超；而來季暫有車仔、阿仙奴、熱刺、富咸、昆士柏流浪及雷丁共6隊角逐）
歐聯，睇莊家開出主隊讓半/一盤口，票數必一面倒去晒下盤車仔，英超情意結也好、賠率好分啲也好，莊家喺今場波，似乎早定與波友對立；看完拜仁上仗喺盃仔慘敗多蒙特腳下後，相信波友買「車」意志更堅，但我倒覺得除賠率稍乏味外，其他數據及軍情拜仁佔盡上風。車仔缺拉美利斯同泰利，對突擊威力及士氣減半，能否又靠杜奧巴喺前面硬爆得逞成疑。小弟也最怕賽前不斷傳出領隊迪馬堤奧，贏輸也會被班主阿巴炒魷；拜仁上仗大敗係唔係踢假波，今場見真章，你盤開得狠，我也怕乜捧埋拜仁[-1]。
英超過後，垃圾波湧現足智彩，小弟要喺擂台每天思量北歐、南美同無謂附加賽，頭都痛埋；猶如巨熊當道，股民仍心癮難當，頻進出短炒股票，好似《爽報》300萬投資組合，一樣滿江紅。過埋今天，本月下旬貼士提供自認也是亂撞居多，希望今天有個happyending，同波友儲足彈藥迎接下月歐國盃。
（今季完結篇）
蘋果波神
今日
重心推介
熱選
黑池（下）
副選
拜仁慕尼黑（上）
冷選
黑池勝2:1（11）、和2:2（12）x拜仁慕尼黑勝[-1]（2.9）2x3