80歲的李香琴行得穩陣，口齒伶俐，是演藝界的松柏。她近年怕捱夜拒拍劇，近日為過戲癮接了朱古力廣告，琴姐殺入球場，表現生鬼，比老臨球員更具活力。現實生活的琴姐也愛看足球，亦有關注明日凌晨車路士對拜仁慕尼黑，醒目的她論盡中外球星，並希望車仔明日勝出捧盃。 撰文：比華利
不得不說，80歲高齡的李香琴比時下不少80後還精靈，她早前為朱古力品牌Snickers拍新廣告，琴姐落場踢波，在球場兩頭騰，精力欠佳被推倒，被隊友揶揄「李香琴上身」，抵死橋段被網友激讚，YouTube的點擊更逾86,300人次。
呻拍無綫劇辛苦
廣告中沒安排琴姐穿上球衣，稍嫌美中不足，車路士與拜仁慕尼黑將於香港時間明日凌晨爭歐聯冠軍，琴姐認為兩隊都勢均力敵，她日前分別穿上兩隊球衣打氣。不過，琴姐有感車仔中有老而彌堅的猛將如前鋒杜奧巴、中場林柏特和後衞泰利等，多加感情分，她當然希望車仔明日勝出捧盃。
琴姐穿上彩藍車仔球衣，臉上霸氣盡現，還踩着足球擺出勝利甫士，她說：「車仔同拜仁，兩隊我都聽過，我仲知車仔好多老牌球員，佢哋都好精壯吓。」琴姐更為車仔作了打氣口號，她咬牙切齒，肉緊的說：「車仔醒，車仔好似我咁勁，一定贏！」
琴姐自爆年輕時也愛看球賽，熱捧哪位球星？她說：「我欣賞老牌東方龍門朱永強，次次睇佢哋比賽，贏咗固然開心，輸咗個心就唔安樂。」莫非想當年「省鏡琴」被球星狂媾，並相約夜蒲？琴姐笑着否認：「唔係，我當年同丈夫未離婚，佢同啲球員好熟，我咪去捧場囉！」談到時下球星，琴姐竟也被英國球星碧咸迷魂，她說：「咁佢好靚仔。」
去年無綫爆挖角潮，琴姐高調續約，希望再過戲癮，可是近年體力大不如前，剛播完的古裝劇《盛世仁傑》也是08年倉底貨，原來同年琴姐還分身接拍《溏心風暴之家好月圓》，她難忘「李兩組」冇覺好瞓生涯，她說：「嗰頭拍完時裝，半夜轉妝拍古裝，有時完晒古裝廠景，馬上又轉時裝飛車出機場凌晨開工，真係好辛苦。」
記性差幸轉數快
琴姐表示怕了捱更抵夜，近日先後推掉三部劇集：「家捱唔到通宵，朝朝早5點收工唔掂，啲導演猛話請得我拍劇，一定實多戲，但趕起戲嚟，唔開咁夜又唔得。」琴姐的子孫都不捨得她拍戲辛勞，只准她以玩票性質過戲癮。
沒有不停讀稿的訓練，琴姐自言近日記性變差，她說：「有時同人講講吓嘢都唔記得，念念吓經，中間又唔記得菩薩個名，你睇我幾論盡。」不過拍攝期間，琴姐換上球衣即靈機一觸，搞笑反問記者：「件衫係咪有廣告？如果有廣告賣埋，我要收番錢㗎，講到銀紙我最精靈。」論轉數之快，琴姐，你係得嘅！
