問米七姑最近接了一個job，不需要問米大陣仗，只是easy執：「喊驚」。因為該名失蹤人士尚未尋獲，生要見人死要見屍，亦未被證實陰陽相隔，所以毋須重手招魂。
但見亞視全台總動員，戴黑超扮喪屍起壇齊齊「喊驚」，實乃仁至義盡，亦「良心」發現。在七姑她老人家英明領導下，一眾豬朋狗友遠親近戚新舊同事上下員工，在祭壇前起幡狂舞。
據知失蹤人士「阿周」，早前誤報大人物死訊，已嚇至三魂唔見七魄，後來還患了自卑感妄想症，一天到晚呻吟：「明明我香港第一，點解唔係One，屈我做二……」極唔忿氣，各人勸他自我檢討，他竟高空擲物洩憤。精神分裂嚴重時甚至入錯女廁，被清潔阿嬸以地拖扑頭。低低地的「阿周」已失蹤近月，遍尋不獲去向成謎景況堪虞。有人猜測他被新電視台招攬，但人家有排都未有牌，又怎會撬一個寂寂無名還充滿傷感的神經佬添煩？大晒冷之日，二三四線均上台，哪見「阿周」？
七姑舉起他底橫率眾大喊：「阿周！阿周！返來咯，返來咯……」