邊個話強國啲足球唔掂呀？你睇，連喺06年幫意大利捧世盃嘅納比都嚟中超搵食。噚日呢位意大利名帥落實加盟FC廣州（廣州恒大），簽約兩年半，仲自爆人工拍得住歐洲頂級教練；而聽講佢年薪有成1億港元，咁屈指一算，兩年半咪執成2.5億，呢勻真係發過豬頭囉！
先排先簽咗巴拉圭射手巴里奧斯嘅中超富豪球會恒大，噚日召開記者會，宣佈外號「銀狐」嘅意大利名牌教練納比，接替韓籍教頭李章洙出任主教練，合約期為兩年半。納比仲爆響口，話自己份糧唔差過摩連奴或費格遜。佢咁講：「我一向唔鍾意討論年薪問題，我只可以話恒大畀到一份好滿意嘅合約我，而且仲去去歐洲頂級水平㖭。我嚟中國教波，係為咗令自己嘅教練生涯更加完整，同埋睇吓呢度嘅足球文化。」
前教頭賠得巨款笑住走
納比把口就咁講，但係，唔係我求大俠諗衰人，如果唔係恒大出年薪1,000萬歐元（約1億港元），佢點會咁屈就肯嚟中超教波囉。納比仲話，首要目標係中超，之後先諗亞冠盃。呢位好鍾意食雪茄嘅64歲教頭表示：「我嘅目標係幫恒大衞冕中超，同埋喺亞冠盃盡量爭取好成績。」
對於搵到納比呢個重量級人物嚟教波，老闆許家印就話：「換教練係公司嘅戰略決策，唔係突然想換，我哋同納比傾咗接近一年，到咗今年5月初先確定換教練。我對納比好有信心，佢有世界一流嘅教波水準同能力，佢好快就能夠幫球隊有新突破。」家陣恒大喺中超排第1，而喺亞冠盃16強就會喺5月30日主場對日聯代表FC東京（見附表），就睇吓納比呢個世界級教頭，可唔可以幫球隊喺中國同埋亞洲球壇稱霸啦！
話時話，雖則李章洙俾納比搶咗飯碗，但聽講恒大都對佢不薄，賠咗成1,400萬人仔（約1,720萬港元）畀佢，唔怪得佢喺許家印幫佢搞嘅歡送會上，表現得鬼咁開心，仲嘔心到同許家印合巹交杯㖭！
