【本報訊】港股小彈再急瀉，散戶好夢成空，信心大淪陷！恒指昨大跌634點，恐慌情緒升溫，牛證玩家一日輸1.3億元，越跌越博反彈的好友即時卻步，加上散戶成手蟹貨意興闌珊，證券行頓然變得冷清，有經紀大叫「全日都無一個客買貨」！
記者：林靜、劉美儀、黃尹華
恒指昨低開238點後持續向下走，收市跌3.2%或634點，報19259點，5月至今累跌8.7%，為99年以來最差，即月期指低水97點；H指則跌3.4%，報9741點，全日主板成交額657.8億元。俗稱港股恐慌指數的VHSI勁升17.3%至27.74，為去年12月中以來的高位。不過截至昨晚10時半，港股黑期反彈約200點。
黑期反彈200點
恒指昨曾勁瀉713點，劏盡19200至19600點重貨區肥牛，全日共70隻牛證遭收回。渣打認股證銷售董事翁世權估計，以昨收市價和街貨量計，牛證買家至少輸1.3億元，熊證買家則賺1.3億元，「咁大額嘅財富轉移近年少見」。
散戶已輸到怕，早前八連跌時的博反彈心態冷卻，瑞信香港認股證及牛熊證銷售主管何啟聰稱，流入牛證資金連續5日減少，顯示好友信心已減弱。
昨日各大證券行內情況相當冷清，平時坐滿散戶的位置昨天變成空位任坐，有經紀指，「散戶信心好弱，早前大市一級一級下滑，都仲見到有人博短線反彈，但今日就已經無晒嘞。不過呢啲反而仲有佢哋嘅生存空間，有啲畀蟹貨紥住，想買貨都無資金。」另一名經紀更直指，「炒股票啲師奶都無嚟嘞」。
淡友亦未見收手，昨沽空率達12.3%，為去年10月初以來的逾半年高位，空襲目標轉至重磅的中移動（941）及滙控（005），前者錄23.64%，連續兩日高於20水平；後者亦錄42.16%。有基金經理指，空軍將目標轉至重磅股，有機會是已沽至水尾。
港滙偏軟 小量走資
東驥基金管理董事總經理龐寶林相信，19000點水平有支持並輕微反彈，策略上會由穩陣的電訊股，換馬BETA值高的內險、內銀及資源股。豐盛金融資產管理董事黃國英表示，中期可憧憬中央再放鬆銀根，但目前會減磅，到放水憧憬形成再入市。
港滙昨偏軟，在亞洲時段最弱曾見7.7699，是去年底來最低。渣打香港環球市場主管陳銘僑表示，希臘籌組新政府失敗令市場恐慌，投資者急於冚盤，小量資金流走，但未見大撤離。東亞（023）貨幣及利率交易部主管陳德祥指，若港股續挫，不排除資金進一步離開亞洲，轉向美元市場。
《投資者意見》
師奶做晒蟹民
經紀陳先生：「好多貨之前已經放晒，家趁低買啲高息股，好似中電（002）呢啲咁，我諗萬八點或見底反彈……不過今日炒股票啲師奶都無嚟嘞，佢哋啲貨做晒蟹嘛，個袋無money嘛，無錢點買貨？借孖展又唔敢借，本來呢度日日好滿座㗎，今日無晒嘞！」
博反彈會被質
城大教授曾淵滄：「目前大家都摸唔到底。由法國希臘選舉開始，市場炒嘅都係同樣消息，基本因素無變，只係博反彈嘅投資者都畀淡友質死咗。呢種情況會持續到成交減少，令淡友沽貨冇人再接貨，沽空無錢賺而唔再沽，到時大市就會見底。」
再等終極一跌
獨立股評人胡孟青：「跌幾百點無咩特別，最好再終極一跌，刺激造淡嘅人出嚟平倉。中國第二季經濟數字好差，三頭馬車全部死晒，相信要跌到大家都抽走資金，個市就會見底。如果恒指跌到17180點造雙底，反彈機會較大，因為淡友就會平倉。」
逾半散戶今年蝕錢
港股昨大插600餘點，大部份投資者皆觀望，未有行動。本報昨成功向217位市民進行電話調查，76%受訪者指昨日大市「沒買沒賣」，選擇撈底的比例只有14%，至於跌市沽貨的，僅有4%。三分二受訪者對後市悲觀，超過一半以上估計恒指會跌至萬八點，估計跌至萬五點的亦有32%。雖然恒指今年仍升5%，但逾半訪者坦言今年已經損手蝕錢。
