【本報訊】盛傳將出任文化局局長的民政事務局副局長許曉暉，其根正苗紅的家庭背景成為近日關注人物之一，《蘋果》記者日前往她的家鄉福建晉江，其父許宏全及一眾親友口徑一致地否認是共產黨員。一再強調「冇入黨、絕對冇入黨」的許父，更向記者說：「好唔想佢（女兒）做（文化局長），人生短短幾十年何必咁辛苦。」
上香稟告祖先︰孫女升官
許宏全現時留守福建經商，記者到其家鄉晉江市英林鎮埭邊村，未見許父蹤影，於是致電給他，許父在電話內中氣十足地向記者表示「有個大型活動搞緊」，暫時不方便見面，但叫記者可以隨時聯絡他。許在電話中堅拒承認自己是黨員，「冇冇冇，絕對冇入黨，大學畢業就喺學校同老婆一齊教書，做咗兩年，老婆繼續教，我調去工業局做幹部」。
許宏全自言12歲離鄉讀書，最後是家中大姐許麗容申請他來港，先在五金廠打工，儲夠本錢在街邊做小販賣生果，然後開設電子收音機山寨廠，再回內地開廠，86年回福建老家經商。
有指許宏全與中央官員諗熟，包括政協主席賈慶林，他沒有否認，但指：我八十年代做生意到家，食飯應酬見過好多人，當年嘅朋友，升咗做市領導，再升咗做省領導，甚至做咗中央領導人唔出奇。」
他又說︰「你家係記者身份訪問我，將來你做咗老總，咁可唔可以話我有《蘋果》高層嘅朋友呢?」
對於盛傳女兒將任文化局長，許即緊張澄清：「未公佈㗎！未知㗎！」但同時又證實傳言：「老老實實講，我唔係好想佢做，之前都唔想佢做，人生短短幾十年何必咁辛苦，但佢話有能力服務大家，由得佢啦，做父母梗係愛錫自己仔女，做唔做（局長）仔女自己決定。」
08年許宏全的五哥許宏點接受本港雜誌訪問時，指弟弟是「共產黨派去香港搞文革、搞政治」，但今年81歲的他前天又矢口否認自己說過這番話，更說：「邊會係黨員，做教書啫，（家族）冇人做黨員，冇人做官，呢個（許曉暉）係唯一一個。」他更在記者面前跪地上香稟告雙親：「你哋個孫女升官喇，要保佑佢！」
但記者到埭邊村的小學，校長許忠表與許宏全曾為同事，他透露：「聽講許宏全係政府派過去，當年派得落去梗係黨員啦。」
