大前日娛樂圈發生風化案，一名女藝人疑被音樂人強姦，昨日陳彥行與梁思浩做電台節目時談到風化案，不期然令行姐憶起當年拍劇被前輩非禮的情景，當年行姐年少無知，被搏懵時不懂反應，但她吃過虧後學精，呼籲女仔小心保護自己。
近年較少拍劇的陳彥行，最近跟梁思浩主持電台節目，昨日行姐、思浩談到大前日的女藝人疑被相熟的音樂人強姦案，令她憶起多年前拍劇被非禮的經歷，行姐透露約八至十年前，與同劇演員合作多個月，感覺猶如家人般建立了信任，並且相處融洽，不過劇組在內地完成最後拍攝工作乘船回港當日，在碼頭發生非禮事件。
恃熟賣熟
行姐昨日接受電話訪問時說：「當時大家互相道別，呢個好似家人咁嘅演員就過嚟同我講：乖女保重、拜拜喇，然後用手輕托我塊面，托面係OK冇問題嘅，但佢托托吓跟住喺心口度掃咗兩下，因為佢動作好快，我都呆咗唔識反應。」
會否是那前輩一時不慎觸及行姐的敏感部位引起誤會？她說：「佢一定係有心，一下當係唔小心，但佢連掃兩下，我冇鬧佢，因為嗰陣細個，我當時都呆咗，呢件事令我睇清楚呢個人，以後小心啲。」
避鹹豬手
事後行姐再沒有跟這位前輩合作，不過在化妝間有碰過面，以往行姐會跟相熟的同事打招呼問好，但自被搏懵後，再沒跟此前輩說話。至於這位前輩是否仍在圈中工作，行姐說：「唔好講啦，總之自己小心啲，俾人搏懵，係女仔都必定經歷過，防不勝防，吃過虧，下次咪小心啲囉。」據資料顯示，行姐在02至06年期間，拍過《緣份無邊界》、《男親女愛》、《陀槍師姐II》、《雷霆第一關》、《皆大歡喜》及《窈窕熟女》等劇集。
此外，不少曾到過風化案錄音室的歌手均談論事件，鍾舒漫表示：「我都認得佢（李銘豪），睇到新聞好驚訝，印象中嘅佢好正常同nice，我都覺得女仔係應該要保護自己，尤其係飲酒嘅時候。」至於陳偉霆被問到可會叫女友蔡卓妍小心點？他說：「佢好識保護自己，所以唔駛擔心。」採訪：汪芷寧