近來氣溫徘徊於30℃甚至以上，熱到爆！既然唔可以好似黃婉曼咁跳出香港，就倒不如跳落沙灘曬太陽。雖然駕車到沙灘隨便一部也可，但今次模特兒Christie話要帶埋昂藏七呎的鱷魚舉行下水禮，適逢富士汽車借出Exiga試玩，才知道車廂大有咁多好處。
記者：蕭漢祥
攝影：林栢鈞
Model：Christie
高容量車廂啱開P
近來無論平日或周末，赤柱及石澳一帶沙灘都人頭湧湧，當比堅尼遇上波濤洶湧的浪花，模特兒Christie話就算舉行今年首個下水禮，都要搵條鱷魚壯吓膽咁話。今次一行三人加隻長達七呎的吹氣鱷魚，普通私家車、甚至是短陣的四驅車都未必放得落，剛好富士汽車借出可載七人的Exiga2.0GT測試，擁有4,740×1,775×1,660mm車身，淨係計內櫳都有2,720mm長，無論是載吹氣巨鱷還是約多六個朋友車上開P，都一樣坐得舒舒服服。同時，Exiga備有特長的天幕，由前排延伸至中排座椅的車頂，前往途中一邊望着藍天白雲，思想與靈魂已跳進沙灘插沙玩水中。
雖然今次會面的Exiga並非全新車系，但車內車外應有的設備均已盡有，例如電動皮椅、加減波撥片、定速巡航等，而Kenwood音響系統除可播放CD，更備有USB插槽直插iPhone及iPod播放歌曲，不但可作為高存量播放器，更加可做電話充電器。
喪跑大潭顯穩定性能
好多人話若想訓練駕駛技術，就要到赤柱峽道及大潭道走一圈，但計我話試汽車性能同樣可在此地跑一跑。雖然Exiga依然採用兩公升水平對向渦輪增壓引擎，但配合「i」、「S」及「S#」三種動力輸出模式，隨着東區走廊使用慳油的i模式，到行走大潭道應付上山落山的狀況，提升為S至S#模式，發覺三者之間懸掛系統設定變化未算好大，表現既舒適且強韌，再配合225匹馬力、車身闊度、全時間四驅系統，表現出強悍的行車穩定性。
睇到呢度，你可能會話：為咗隻吹氣鱷魚就要揸大大部車，去到沙灘先充氣咪慳位好多囉？要知道呢個世上有種人叫「懶人」，屋企有電泵話咁快就充完氣，去到沙灘先充氣，恐怕未曬太陽已泵到無力游無力玩，係咪好有道理先。
SubaruExiga2.0GT
引擎：1,994cc水平對向四汽缸，渦輪增壓
馬力：225ps/5,600rpm
扭力：33.2kg-m/4,400rpm
傳動：五前速自動連+/-撥片
售價：$343,107
查詢：25112727（MotorImage）