本月29日係亞洲電視55周年台慶，最近經常喺電視睇到啲好出位嘅宣傳片，包括台慶膠歌《GimmeFive》，我哋一齊Shout亞洲亞洲，「亞洲」到人人開心大笑；仲有陳啟泰嗰個瓦努亞洲、姜皓文嘅「仆你個街亞視嚟㗎喂」版都俾網民笑爆，另一條母親節宣傳片，搵蔡國威去山墳拍，又真係幾另類幾特別。
馮仁昭收到風，原來亞視最近請咗之前同楊恭如拍過拖、做過亞視體育記者嘅蔡錦豐返去做創作總監，負責所有亞視宣傳片創作，估唔到呢個前香港籃球代表唔止打波叻，諗橋都唔差。
情願俾人笑
而亞視噚日安排咗全體藝員為台慶做壽包，包括黎燕珊、劉錫賢、姜皓文等，有份拍「亞洲亞洲」MV嘅劉錫賢對於啲宣傳片喺網上hit爆，佢覺得有話題總好過冇話題，而啲歌詞又表達到好開心，但係啲網民係取笑喎？肥仔賢話有迴響就係好事，肉唔肉酸就見仁見智喎！而姜皓文就覺得啲宣傳片出嚟俾人笑都係好，因為台慶本身就係開心事，兩位男士都睇得幾通透，反而係亞姐黎燕珊，好認真話覺得係因為亞視樹大招風喎。