劉德華和老婆朱麗倩的小龍女上周三秘密出世，直至日前華仔才在網上正式公佈做老竇的喜訊。身為小龍女契嫲的葉德嫻前晚出席電影活動，大讚華仔事前做足功課，甚至連有關DNA的資料也仔細研究，葉德嫻又鼓勵華仔追多個。
葉德嫻前晚到圓方出席「香港薩蘭托國際電影節」，她再憑電影《桃姐》獲SalentoAward，大會除向她頒發獎座，更送上著名的碟子工藝品。葉德嫻在台上坦言：「其實我好想華仔可以嚟，但係佢做咗老竇要照顧BB，不過我真係好戥佢開心。」問是否憑《桃姐》攞獎攞到手軟？葉德嫻笑言：「唔好咁講，手跛都要攞，多謝意大利人欣賞套戲。」
傳短訊問候
劉德華日前在網上公佈朱麗倩和小龍女已出院回家休息，問葉德嫻有否探望契孫女？她說：「未有，畀啲空間佢，生BB唔容易，不過我有sms佢，唔敢打畀佢，因為怕佢湊緊BB會嘈醒。」
葉德嫻又讚華仔是好老竇：「佢真係做好晒準備，事前睇咗好多書，連有關DNA嘅都睇埋，好似專家咁，所以佢一定係個好爸爸，真係好難搵。」
怕Ｂ相外洩
問會否叫華仔追多個？葉德嫻坦言要看朱麗倩身體情況如何才能決定，她笑稱：「遲啲喇，李琳琳當年50歲都仲可以生，佢哋有心有力嘅。」如此看來現年46歲的朱麗倩，的確還有時間再為華仔添BB。
記者再問葉德嫻華仔有否傳小龍女的相給她看？她說沒有，亦不想他傳來：「萬一有乜事啲相流出去，我唔想佢賴我。」問葉德嫻有否準備食薑醋？她聞言即大叫怕怕：「我唔食，一向都唔贊成媽媽食呢啲嘢，以前啲人話可以驅風，媽咪生BB時已流失好多鈣質，其實薑醋對牙齒唔好。仲有以前啲人話生完嘅媽咪唔好冲凉同吹冷氣，咁媽咪熱到成身汗點算？」
採訪、攝影：譚倩宜