麥長青前年憑着《巾幗梟雄之義海豪情》梁非凡一角，奪得台慶最佳男配角獎後，演藝事業看似終捱出頭，劇接劇之餘戲份亦加重，於新劇《耀舞長安》中擔正。看來一「凡」風順，有誰想過2010年奪獎前的他卻心淡到想定後路，打算退出幕前。
訪問當日麥長青（麥包）氣喘喘落車，第一句便問是否於餐廳做訪問，到達餐廳時他第一時間點了湯河，邊做訪問邊吃，期間更接了數個有關生意的電話，麥包坦言只於無綫拍劇，絕不夠一家八口的開支。
麥包說：「我成日講緊一家八口唔係只得自己一家，仲有外父外母、細佬妹，我唔覺得係一個負擔，反而係我一個好強嘅動力，凡事都要再做好啲。」
「團火仲未熄」
前年奪獎後，麥包的工作量是否急劇增加？他說：「真係冇，最多係多個花名囉，以前啲人會叫沙僧，家會叫非凡哥。」麥包更表示多年演藝生涯中灰心過數次，前年更萌生退出幕前的念頭：「我前年真係好灰心，覺得好似一潭死水停滯不前咁，我2010年年頭都同定陳妙瑛講話想唔做，仲叫佢請我幫手，佢話冇問題。不過之後拎咗個最佳男配角，發覺團火原來仲未熄。」
親情比錢重要
麥包圈內外人緣皆好，他表示早年曾有朋友叫他幫手到內地發展，雖然賺的一定比現時多，但他考慮了三個月後，卻婉拒好友的好意：「我上得去點都要搞十年，我唔想錯過咗仔女長大嘅片段，我唔需要大富大貴，頭家先係最重要！」
採訪：文國駿 攝影：葉君海