曼城我主場，這片藍月亮的確是用金錢雕砌出來的，不過，同樣有錢使得鬼推磨的車仔，命運冇曼市雙雄那麼好，連第三名都不敵阿仙奴。有時候，我們不能說，有錢一定能贏，梁振英未開波已經大灑金錢，增設司局，將臃腫的高層架構再發水多一倍。被公帑養到肥肥白白的高官，還扮晒好打得，OMG，一落場撻Q插水，呃得到誰？
球隊一擲過百億，買腳不手軟。這是以往窮到只剩草的曼城不敢想像的威勢。多得阿聯酋新班主大開水喉，招兵買馬，黃金陣容出戰。嘿嘿，你以為林鄭首肯留任，就能在補時一分鐘阿古路上身，絕殺一擊，將特區跟曼徹斯特的藍天對等？咳咳，市民不禁重複費爵爺的金句：曼城想追上曼聯，要一百年！林鄭想變身四萬，絕頂難，埋門一腳，欠到位輸送。林鄭身價肯定是阿古路級了，不過，最值租那一腳，不容易踢得出來。身價波講求天時地利人和，上半場，入新界打，就算對住榜尾降班馬，又有邊個夠膽說，這邊贏硬。
曼城餓聯賽冠軍44年了，終於戲劇性攻頂。梁振英餓特首這份job多時，雖然低票，最終順利上位。七一坐正之時，十五的月亮，瞬間曼聯，爆紅。