海迪猶記得兩年前，久未露面的體操王子李寧罕有親見傳媒，向大家推銷佢隻非凡中國（8032），話要打造咩「體育、地產、環保」三大概念集於一身嘅「住宅休閒體育社區」！海迪覺得，幫王子度呢條橋嘅真係認真創意「非凡」，公司成功向投資者配股籌到12億錢，海迪記得當時投行仲吹風，話中投、富達都有份攞貨㖭。如果佢哋到家都未走人嘅話，前後都蝕咗80%囉！咁講好要大搞嘅業務呢？似乎係得個吉囉。
前晚非凡公佈首季業績，公告中披露，原來佢主打嘅瀋陽生態城項目，之前用10億（人民幣．下同）投咗嗰塊長白島地皮，一年來其實一直拖住政府8億尾數。呢筆數今年首季已經到期，但非凡依然無找數，國土局家隨時可以索償，沒收非凡嗰2億按金，又或者罰款1.9億（即2.3億港幣）！不過非凡話未收到公訴書，所以認為唔使撥備住！
非凡話考慮過資金需求之後，覺得呢個生態城係要搵人合作，甚至成個project賣走、取消佢算喎！呢單嘢搞咗咁耐，最後淨輸兩億收場，咁都得？非凡手頭現金有約11億港元，其實無點用過錢。海迪想勸王子唔好搞咁多嘢，不如派番出嚟算啦。
海迪