【我得寵】平日繁忙工作過後，回到家中總想有人來慰藉心靈，不少時下女性都會選擇飼養寵物作傾訴對象，模許穎（Phoebe）去年底本想找一隻聽話可愛的長毛臘腸狗做新伴侶，怎料被騙了換成百厭無時停的剛毛臘腸狗，小狗「布丁」愛枕在34D的Phoebe咪咪，令她既心甜又氣憤。撰文：馬建華
模許穎去年暑假成功彈出，入冬後便轉型走打碟歌手路線，務求殺出一條血路，縱然身邊男伴不絕，但回到家中當然想有穩定的傾訴伴侶，去年她飼養的兔仔年老逝世，雖然家中仍有兩隻貓仔陪伴，但Phoebe仍覺不夠滿足，故去年底到寵物店覓心頭好，她對臘腸狗女「布丁」一見鍾情，當時根據店內提供資料，布丁是長毛臘腸狗，個性溫馴聽話，絕對符合Phoebe的要求及眼緣，沒猶疑下便決定將兩個月大的布丁帶回家展開同居生活。
唔識驚兇狠貓
時間漸過，Phoebe發覺布丁換毛後身上的毛仍然是短毛，兼且個性越來越百厭不聽教，她說：「我開始有啲懷疑佢唔係長毛臘腸狗，於是根據布丁嘅特徵上網搵資料，最終發覺佢品種係屬於剛毛臘腸狗，比長毛臘腸狗難教好多，我最初俾佢個可愛樣呃咗，佢BB時個鼻冇咁長，望落去好似金毛尋回犬BB咁，真係好得意，每次返工幾忙幾攰都好，返到屋企見到佢就好開心放鬆晒。」
帶新成員回家，Phoebe遇上另一問題是要平衡布丁與家中兩隻貓的相處問題，Phoebe說：「其中有隻貓成日向布丁發惡，加上布丁又成日唔知驚，鍾意撩兩隻貓玩，平時布丁會瞓喺我大髀度，咁就唔驚俾貓襲擊，所以我出街時會將布丁放入籠，夜晚瞓覺都一樣，以免兩隻貓突然出爪傷害布丁。」
扮發軟蹄撒嬌
Phoebe以前飼養過魔天使，但中途因某些原因不能再飼養而轉贈友人，今次是首次由BB養起，她說：「布丁返嚟時已經唔使餵奶，可以浸腍寵物餅畀佢食，家食糧主要都係普通狗糧。」
平日與布丁相處就好似母親湊初生BB一樣，因為布丁鍾意Phoebe好似抱BB般抱牠於胸前，又愛撒嬌，她說：「佢好識嗲，平時行十幾步嘅距離，佢會放軟後腳好似發軟蹄咁，然後用可憐眼神望住你，要抱，遇到大狗就好熱情走埋去，但俾大狗拒絕後就冇心機返轉頭，要你番。」會否為布丁找男友配種，Phoebe以健康理由決定為布丁做絕育手術，她說：「只要能夠令佢健康就會為佢去做，屋企兩隻貓同樣都閹割。」
攝影：陳志嵐
最叻轉圈瞓地
好多人不惜花費金錢為愛犬扮靚，Phoebe同樣帶幾個月大的布丁到寵物美容院扮靚，怎料個子細小的布丁面對美容院內的風筒好似遇着颶風一樣悽慘，Phoebe說：「試過一次見到店員為布丁吹毛，點知布丁俾佢吹到臉容扭曲，好似好慘咁，之後我就決定自己幫佢冲凉，其實佢咁細隻好易冲。」
出街大陣仗
每次出街Phoebe會為布丁準備狗糧、水、玩具、濕紙巾及靚靚狗袋狗鏈，平日她會上網看看訓練狗的片段，跟住親自教布丁做動作，現在基本動作如坐、企、轉圈及瞓地，布丁都識做，有此成績Phoebe也甚有滿足感。
布丁
品種：剛毛臘腸犬
年齡：7個多月
性別：雌性