蘋機會：500人圍城　為《D3》深宵捱熱

男人等女人12年係癡情；Game迷等一隻Game12年，就近乎黐線，不過全球有千千萬萬人一齊黐。本以為世界末日前都玩唔到嘅《Diablolll》，前晚終於喺海港城首賣，500機迷苦排十幾粒鐘、捱熱忍汗臭，就係為咗再次戀上那些年的黑暗打機煉獄。

記者：韓繼聰
攝影：譚盈傑

即場炒上$2,100

14號深夜，尖沙嘴海港城商場店舖全已落閘收工，就只剩下一間唱片舖燈火通明，人聲鼎沸，為嘅就係同「戀人」重遇。當年《Diabloll》瘋魔萬千Game迷，只係無人估到新作竟等足12年先再出現。今次《D3》在港首賣，共有200套限量典藏版及300套普通版，每套遊戲更附送一Set限量精品。負責人Agnes話成本已接近500蚊，難怪Fans千辛萬苦誓要爭到限量禮品為止。排頭位嘅大部份係真正機迷，但《D3》典藏版在網上早現炒價，由原價$919炒至$1,400至$1,700不等，所以吸引唔少南亞人、菲人排埋一份，更有買家即場兜售，開價$2,100但卻乏人問津。
終於等到凌晨開賣倒數，Fans們如願得嘗，齊齊興奮歡呼！來自北京，排頭位嘅Wayne，晨早六點就開始排隊：「我15歲開始同朋友一齊迷《D2》，今日專登請假嚟排隊。」另一位奧雲就話：「我好鍾意佢嘅遊戲設計、風格同故事，對《D3》絕對有情意結，今日終於等到！」坐喺附近嘅阿Rain，雖然一直唔肯上鏡，但聽到我哋傾《D3》又忍唔住加把嘴：「我小學三年級已經同老竇打《D1》，今次限量版仲送對光翼（虛擬道具），真係唔排唔得！」從Fans嘅激動同熱情，深深感受到佢哋對《D3》嘅期望。

■首賣會有200套限量版，及300套普通版預留畀玩家。

■極多人聚集海港城後欄，天氣熱，加上大家汗味四溢，等同置身遊戲「煉獄」世界。

■機迷買到《D3》後，不禁直豎拇指，流露出興奮之情。

■排隊人士都要登記身份證，以確認身份，安排上算公平。

新系統有辣有唔辣

經過12年進化，《D3》畫面同系統都有大躍進，有老一輩機迷就話：「等咗12年，婚都結埋，近年已好少打機，但為咗《D3》都專登Upgrade部腦嚟迎接佢！」其實《D3》對系統要求唔算苛刻，打開機嘅腦都應該應付到，想睇盡靚畫面同Load得順啲，升級顯示卡同硬碟就唔慳得，而你亦可以上CanURunIt網站，Check吓部機夠唔夠「力水」。
遊戲系統有多方改變，例如取消「技能樹」系統，令玩家更自由選擇技能出戰、新增比「地獄」更恐怖的「煉獄」難度，怪物嘅血係普通難度嘅數百倍！最受機迷關注一定係「現金物品拍賣系統」，令遊戲與現實金錢掛鈎。Fans之一嘅Tony就唔多認同呢個Idea：「狂煲《Diablo》「打寶」，唔係為錢而係滿足感！家搞現金拍賣，對職業打手梗係好事，但好易令遊戲變質。」從老機迷語氣同眼神，完全感受到甚麼是愛之深，責之切。