蘋機會：女友跳升五號　特效藝術家

早前曾在微博曝光的GF5，日前終於推出。在跳過死死聲的四號，新機型號直上五號，感光度、對焦速度齊齊升呢，14種濾鏡特效一篤即玩，尤其係其中一款「深刻藝術」特效，平平無奇嘅相，一㩒即變得有氣氛有層次，好神奇。

記者：許福合
攝影：劉永發
Model：Ayanichiang@PureModels

同iPhone差不多大

其實發展到今時今日的GF系列，機身越來越細，同iPhone面積差不多，迷你機身更貼切女玩家手形，叫男友系列似乎更適合。㗎仔都迷信，新機跳過GF4以GF5命名，論外形其實與GF3分別不大，保留最讓用家爭議，鏡頭上的曲頂設計，是否美觀見仁見智，但仍有改良的地方，如手柄加上皮面，令手感更佳。有驚喜的是機背屏幕，雖同屬三吋輕觸式，畫質更由GF3的46萬像素提升一倍至92萬，在相片色水及對比度方面都有明顯提升，簡直媲美喺電腦上睇！

■正面睇，可換鏡的GF5，大小與iPhone差不多。

■機身小巧，放入手袋照樣去行街Shopping。

■曲頂的機身，仍可彈出閃燈。

■除拍攝高清片，新機仲可以立體聲收音。

■3吋92萬像素屏幕，仲可以玩輕觸式操作。

■手柄位鋪上仿皮物料，比白色膠面更好揸。

0.09秒對焦

創意濾鏡係筆者必玩功能，GF5的濾鏡數量由6款激增至14款，其中「深刻藝術」可將平平無奇的環境，營造出戲劇效果，特別有趣味，尤其在輕觸芒使用下，一篤便玩出各種神奇特效，令拍照以外加添不少趣味。
配備1,210萬像素LiveMOS，唔算突出，主要賣點是速度提升。將VenusEngine改良後，對焦速度快上加快，極速去到0.09秒，連拍亦增至4fps，就算高一級的GX1也不過4.2fps，GF5作為入門機已算交到貨。另一重要升呢，是ISO增至12800，配合NR，令高ISO表現都比上代更滑淨，是酷愛拍夜景人士恩物。