候任特首梁振英頻頻落區做騷，爭取民望，據講係以身作則，他日各位司局長也要學足梁特首，不時落區與市民會面。咁樣，邊個留在辦公室睇文件，應付立法會提問，出席立法會俾泛民議員手指指做人肉錄音機呀？咪會係啲副局長囉。一位老友收到電話講副局長，佢一時誤會，以為有人搵佢做副局長，即刻推辭，但對方話：「唔係呀，人地搵我傾，我想問你意見，我做副局長好唔好？」老友梗係話唔好啦，無謂在四十度氣溫下飲碗滾熱辣嘅當歸雞湯吖嘛。呢位老友話俾左丁山聽：「梁生啲司局長人選，應該人齊，但搵副局長人選，仲更加頭痛。」
梁特首做事心急，講求效率，輪候公屋多一個禮拜也嫌長，但在其他方面，就識得打拉布。據新報（五月十三日）報道，佢到青衣家訪，工聯會區議員麥美娟乘機問佢幾時為標準工時立法，以解決盛女問題，因為工作時間太長，不少女士冇時間去交際識人、拍拖喎，但梁特首支吾以對，只話「會重視」標準工時呢個問題，會依政綱執行；麥美娟在梁特首上車離開時，梁生竟然話：「我會在24小時內俾五個男士嘅相片同履歷你。」麥美娟對記者講：「佢寧願介紹男仔畀我，都唔承諾立法標準工時。」
麥美娟係典型盛女，左丁山識佢之時，佢剛自中大英文系畢業，不知何故，彭定康會睇中佢，委任佢為區議員，成為全港最年青區議員政治新星，點知咁就連累咗佢嘅感情生活，做咗二十年區議員，工作無定時，假期仍要落區，拚命落區工作，拖到而家仍然係盛女，左丁山都戥佢唔抵。
靚女盛女Ｔ呢日打電話嚟問投資氣候好定壞，係咁意問佢一句：「拍拖未呀？」靚女Ｔ即時大發嬌嗔：「你介紹個二十八歲美男或五十歲富翁畀我啦！」左丁山速速收口。想當年，佢在情人節日收花以打計，佢只對一位男士睇得上眼，打電話去詐嬌：「哎吔，你送嚟打玫瑰有一顆係殘咗噃！」點知年輕男子不識情趣，誤以為佢唔鍾意，以後唔敢再送花，跟住追求比較容易埋手嘅部門女秘書，靚女Ｔ失望到極，從此埋首工作博升職，升到高級職位，仲無男仔敢行埋嚟，就因此成為盛女，可惜也。