自由才能產生創作！版權法修例引發捍衞二次創作。天生為創作而活的歐洲人擺明比較幸福，大可天馬行空做自己所想的，更能引來「國際關注」！說的是今次主角──芬蘭怪誕時裝設計師DanielPalillo，專攻怪Cut詭異Pattern、喪搞賓尼兔，近自Y記Sammi、遠至LadyGaga都捧過場。今番來港大晒CrossoverROXY新作，繼續怪雞，還大鬧海龍宮。
記者：雷福財
攝影：林栢鈞
模特兒：Tegan@ModelOne、EkaterinaK@MissionModel
唔跟風反被跟 6.11首賣
時裝設計師最常遇到人生交叉點，即明明覺得自己的設計已經好正，但無人欣賞，為生意着想是否需修正一下，以切合大眾口味多一點？但落於這位芬蘭設計師DanielPalillo身上，事情剛好相反。唔跟潮流，大玩奇裝異服Oversize、詭異骷髏頭、搞死賓尼兔及阿森一族、大眼圖案等，加上最愛黑白灰，偶有來個紅黃，已算恩賜，但就勝在夠幽默又夠Unique，出道四年經已儲落一大班客仔。今次連滑浪女牌ROXY都睇中佢，齊齊怪雞潛入深海，幾時都話時裝都係偏心女性。
說回今次聯乘作，保持Daniel一貫元素及風格，黑白色調走不掉，起角設計扮鯊魚鰭或八爪魚觸鬚CroppedTee、尖牙One-piece、怪眼圖案ToteBag等，均以立體、誇張、怪誕的剪裁，輔以粉紅、粉藍兩種顏色作點綴，明玩海底世界各式奇珍魚類。至於單品亦充滿特色細節，如於膝蓋位開洞的Leggings及繡上眼睛圖案的長褲、Bikini系列等，6月11日於指定ROXY店舖限量開售。
作品怪雞，再搭件Nirvana的名歌詞「IHateMyselfandIWantToDie」，以為又一憤世設計師，但真人原來怕醜又斯文。
DanielPalillo我從不看時裝秀
A：AppleDaily D：DanielPalillo
A： 聽說你是第一次來香港？
D： 原則上不是，不過對上一次是我五歲那年，太耐之前已印象模糊。
A： 2008年時，為何有創立品牌的念頭？
D： 06年那時，開始埋手創作作品，當時只是逐小的發佈，未成為Collection，到了08年，忽然有種直覺話我知要正式開始了。
A： 你的作品為何總以骷髏頭、卡通人物、眼睛為設計元素？
D： 小時候我好鍾意睇卡通片同漫畫，特別是《忍者龜》同《太空超人》，我想是受到影響吧。加上芬蘭天氣又凍，一年有成九個月係無陽光咁滯，所以希望藉設計帶出多點開心元素。
A： 覺得自己屬於哪種風格？
D： 這條問題有好多人問過我，我都唔知，哈哈，或者是DanielStyle。
A： 今次與ROXY聯手推出DanielPalilloforROXY系列，過程是怎樣的？
D： 大約一年前，當時我在紐約的一間Cafe內CheckEmail時收到他們的合作查詢，我覺得件事好有趣，於是便開始構思。我覺得魚、尖牙等元素很代表到海洋這訊息。
A： 與自己Mainline有何分別？
D： 主線一向都是較Unisex，而今次只為女性而設，很Girlie。剪裁上會傾向SlimCut而非Oversize。
A： 怎樣看二次創作文化？
D： 抄襲當然不會喜歡，但對設計師而言，歷史或發生過的事好重要，這是一個故事、靈感去創作，就好像AndyWarhol創出另一新事物出來一樣。
A： 覺得香港時裝發展如何？
D： 我唔係見得太多，但好像幾Nice，香港女仔比起芬蘭人着衫更大膽，有點似日本。
A： 自己最欣賞哪個時裝設計師？
D： No！我從來唔睇FashionShow，唔理潮流，我愛自己的設計。
A： 那麼如何尋找設計靈感？
D： 我鍾意睇HeavyMetalShow搵靈感，又或者周圍行，望吓身邊的人和事。我其實都唔係太清楚，只係嗰刻好鍾意就用了，可能下一年會以車作為主題，我着重落筆設計那刻的感覺。
ROXY（28955836）
銅鑼灣廣場1期1樓