通常每個板塊嘅龍頭股，市場都會俾啲Premium（溢價）佢，不過呢個Premium究竟應該值幾多呢？海迪覺得近年呢啲股份，就好似香港啲一手樓咁，貴到有啲離譜，尤其係新股，你睇周大福（1929）股價就知咩事。最近有隻「鑽石之王」就係以「大粒」為賣點，仲好似意向至少要20倍PE（市盈率）先肯賣。咁大粒到底係唔係一項優勢呢？
翻開保薦人報告，就發現因為「鑽石之王」嘅產品太大粒喇，有財力做到佢哋客仔嘅人唔多，所以銷售極度集中，佢單一最大客戶，過去三年已經佔佢哋銷售16%、12%同13%！海迪唔知呢位貴客係英國皇室還是中東貴族，但係假設佢有一日瞓醒心血來潮唔再玩珠寶，咁對公司嘅影響可想而知。而過去三年，「鑽石之王」平均每年都賣出至少一粒價值7800萬以上嘅巨鑽，如果嗰期經濟唔好，富豪無心機買巨鑽曬命，咁公司嘅財務表現就好容易大上大落，仲要係你事先估佢唔到嗰隻。投資者鍾意揀大隻股份，除咗係因為佢哋市場地位相對穩固外，亦係Buy佢哋嘅可預測性較高，可以估到佢發生咩事。但如果你大隻得嚟，盈利表現卻更難推測，加上喺增長最快嘅亞洲市場無咩經驗，海迪真係替佢有啲擔心囉！