私駕路：加頂太陽帽　唔使焗桑拿

陽光猛烈的夏天又來臨，車主最頭痛莫過於被迫露天泊車，架車擺喺街邊錶位曬一曬，不出半個鐘，車廂頓時變火爐。最新到港的豐田Prius就醒目地戴了一頂太陽帽，即使唔着車都識自行抽風散熱，更可離遠開定冷氣，跳上車一刻唔使搞到焗桑拿咁慘烈。

記者：許維雅
攝影：蔡家輝　
Model：KitJ、Jamie@GME

太陽能板　收集電力抽風降溫

■女友怕曬，就幫佢加頂太陽帽；女友怕熱，就要幫架車加塊太陽能板用來散熱。

今個五月天已多次輕鬆衝破30℃的關口，總覺得今年盛夏的酷熱戰實在唔講得笑，人就話可以戴帽撐傘做定防曬功夫，車無理由每次停一陣都要落防曬套咁麻煩，更加難以避免泊街邊錶位堅持唔曬車。15年前開始踏出環保汽車文化第一步的豐田Prius，今日就再為車主諗多一步，於新一代Prius車頂加上太陽能板收集電力，即使無着車都會自行啟動通風系統幫助散熱。拍攝當日，泊在露天停車場的汽車即使已用了太陽擋，車廂溫度亦高達40℃，雖然最後未夠時間慢慢曬部Prius，比較通風系統效用有多大，但相信車櫳只需要有輕微的空氣流通，已可有效減低車廂溫度，避免大家上車每每將冷氣扭到最盡，從而節省更多能源，更能夠全面實踐環保宗旨。不過，要啟動通風系統，離開熄車前先要按着司機位右手邊的按鈕，其次，太陽能板要在太陽直接照射底下才能運作，雖然感覺有點如太陽能電筒，但總叫做好過無，而通風系統只限貴四萬幾的SuperLuxury版才有。

■車頂加多一塊太陽能板，收集電力推動通風系統，令車廂降溫。

■普通一架車的內櫳溫度高達40℃，難怪Prius要想辦法降溫。

■遙控匙有A/C的按鈕可離遠開定冷氣。

新增6.1吋彩芒　兼容後泊鏡

想跳上車時感覺更凉快，新到港Prius亦加入了遙控空調系統，智能車匙上多了一個A/C按鈕，即使離遠準備行近取車，都可以預先喺未着車的情況下遙控開啟冷氣，凉定先。至於外形上，與之前的Prius分別並不算明顯，包括車頭泵把、進氣欄柵及霧燈鋪排、尾燈設計等都有所改動，其餘車身尺碼、低風阻的流線型車身及17吋合金輪圈等就跟之前相若。若要數較大的分別，反而是車廂中控台新增的6.1吋EGA顯示屏連八喇叭JBL音響系統，因此亦同時加了後泊鏡頭方便睇位。配合投射式顯示屏、前排座椅設發熱功能及附設花粉過濾器的恆溫冷氣等豪配，照顧全面。性能方面亦沿用1.8公升油電混合動力引擎，配合電馬達總輸出達136匹，不過綜合油耗就只需要23.8km/L，每公里約$0.7。汽油越來越貴，天氣就越來越熱，既慳油又識散熱的Prius一定可以吸引更多環保迷。