拉布疲勞轟炸，建制派議員反對通宵開會，指通宵開會，會累出病。為拉布拉柴，勢破世界紀錄。議員殉職，唔使驚冇龕位，梁振英實會開綠燈，急議員所急，下葬浩園。
拉布戰中，建制派女議員失蹤。女強人頂得住半邊天，但頂唔順拉布，捱通宵的話，難道政府俾錢佢去拉臉皮補救？
最新預告，拉布決定向闊佬效法，實行一拉二拉三拉，一直拉到四奶！
拉隊鬆人是不負責任，拉布卻是議會行為藝術。門常開忽然文化過文化中心，那些睡着了的建制派議員，不是布公仔，是一尊尊雕塑，比化石更有看頭。
拉布的喜劇結局是拉埋天窗，洞房。最諷刺的結局是拉爆褲鏈，穿崩。最壞的結局是拉人封艇，黑影，咪郁，否則開槍。
拉上補下唔夠數，建制派冇影。建制派，你阿媽和曾主席喊你回去補倉！
拉布唔同拉素，門常開唔係打緊意甲，建制派議員卻個個爭領紅牌，離場甩難。呢隊二打六，仲唔係打假波？