本報娛樂組獨家直擊「陳七偷食」成全城熱話，我求大俠噚日專登走去蒲崗村睇南華操練，睇吓陳七點解畫，點知佢人影都冇，助教陳志康話佢請「事假」；聽講班主羅傑承為「偷食」一事大發雷霆。梗係，專心打造多年嘅「足球明星」一朝夢碎，唔嬲就假！
事實上，近年有幾多個班主願意投放大量金錢同心力，將球員打造變球星。好似南華早幾年，call晒啲名牌贊助幫班少林兵變「星」，一時搵名牌西裝贊助，一時又拍內褲廣告，搞到班和尚仔以為自己真係「星」。最沉醉於「造星」大染缸嘅一定喺七哥，09年東亞運一球成名後，佢嘅場外生活就多姿多采，拍得住曼城嘅「腦殘」巴洛迪利。
羅生當年高價招攬
講起呢位「腦殘」，其實七哥都有佢嘅影子，08年效力傑志期間，試過喺練波同隊友王振鵬打架，搞到傑志以紀律差為由，取消陳肇麒嘅足球明星選舉提名。南華足主羅傑承認為七哥係可造之才，就以本地高價轉會費（據聞80萬港元）羅致佢。
陳七立立亂嘅情史整到我求大俠都冇眼睇，更何況使咗唔少錢喺佢身上嘅羅生？作為前鋒，陳七嘅入球數字可以話喺每下愈況，加盟南華首季都仲有19個入球，但到近兩季勁跌watt，得番6球，你話同佢場外亂糟糟嘅生活無關就假。今年2月陳七當街煲煙，運動員形象盡失下俾羅生照肺同雪藏；但佢死性唔改，今次又再當街煲煙後去「偷食」，有相有片，冇得抵賴。羅生即時取消陳七參選「足球明星選舉」，仲話會有內部處分㖭。
葉鴻輝：得肇麒被跟
網民BenChan就話：「有時唔明羅生諗乜，佢身為生意人，做生意應該好精明，冇理由繼續花錢去捧足球明星，你以為咁樣會令大眾對本地足球員改觀咩?」
另一網民CheungTom指：「羅生終於覺悟，不再護短。希望羅生保持這種虛心態度，下季能夠帶給南華人一隊朝氣蓬勃、敬業樂業、上下一心的南華。」
南華隊長陳偉豪噚日操練時回應：「呢啲私人事件唔會影響球隊，反而今年冇錦標，全隊人就好失落。」葉鴻輝就有意無意咁話：「南華其他球員都唔係特別多人跟（指狗仔隊），主要係肇麒一個。」一心打造粒星出嚟，點知爛泥扶唔上壁，睇怕羅生呢勻真係計錯數囉！
陳肇麒小檔案
綽號︰陳七
年齡︰14/07/1985
身高︰1米88
體重︰80公斤
位置︰前鋒
現效球會︰南華
曾效球會︰大埔、流浪、傑志
個人榮譽︰東亞運金牌、香港足球先生、足球明星及最佳青年球員
國際賽紀錄：
05-12 香港隊40次入32球
04-09 奧運隊16次入13球
