郭富城十年前同藤原紀香愛得火熱時，女方要求結婚，城城都冇成家立室之意，最後紀香黯然提出分手。但六年前城城戀上名模熊黛林（Lynn）後，想法似乎有變，仲開始有結婚念頭。
工作排到年底
噚日有報道指城城同女友下月去澳洲秘密結婚，Lynn最近又戴上三卡鑽戒，佢經理人Kim噚日回應：「下個月阿Lynn要拍戲同拍廣告，今年咁忙，冇可能結婚啦！」問到Lynn爸爸係咪患癌，最近嚟香港做電療，熊父係咪想個女早日成婚冲喜？Kim話：「人哋爸爸嘅事，我唔方便評論，但今年結婚應該唔會啦！佢冇同我提出過請假，所以佢嘅工作安排一切如常。」
城城經理人小美就話：「城城下半年工作都安排晒，城城冇向公司請假。」據悉城城下月要到內地演出一部同孫紅雷合演嘅電影，工作排到年底，如果兩人真係要結婚，最快都是明年暑假後先有可能。
不過早前Lynn父母來港，城城抽空同女友家人一齊吃飯，家長都見埋，幾時拉埋天窗，就睇城城喇。
