人稱「Rose姐」嘅恒生銀行（011）新揸fit人李慧敏（圖右）噚日正式履新，以副董事長兼行政總裁（CE）身份主持恒生高層會議。恒記出名係本地藍籌企業中最多女性董事嘅銀行，為咗歡迎女CE首日上班，恒生中國副董事長兼行政總裁薛關燕萍（圖左）代表一眾管理層，以該行股票編號11，向伊人獻上11支粉紅玫瑰，襯埋Rose姐個英文名。各高層仲喺鏡頭前齊齊互相揸緊拳頭，做出「愛拼才會贏」嘅打併手勢，集浪漫同潮爆造型於一身。
上星期五恒生股東大會，華華同重出江湖嘅Rose姐閒聊，佢好謙咁話，金融市場近年瞬息萬變，自己都要不斷學習，不過佢深信，雖然過咗幾年半退休生活，但一撻番着副engine，可以好快適應。