每年5、6月都係年度股東大會嘅集中期，亦係上市公司向股東開「家長會」嘅時間，接受股東質詢，好似希慎（014）舊年成績唔錯，但亦都俾一位自稱同歐洲股神安東尼波頓（AnthonyBolton）做過同事嘅小股東大彈，話公司將閒錢攞去炒股，唔投資物業係「不務正業」喎。
新CEO：冇買好耐
呢位小股東話，自己以前都做過分析師，仲係喺歐洲股神嘅富達基金打過工，對投資相當有經驗，但佢認為希慎舊年用咗20億銀炒股票，不過冇乜回報，如果攞筆錢去投資吓物業，升值好過股票多多聲啦，佢仲話希慎買股票係為咗應酬，「我聽聞過，公司為咗應酬，要接咗唔少股票，我覺得要應酬，不如用一百幾十萬去食鮑參翅肚好過！」
噚日正式接替嚴磊輝、新出任行政總裁嘅劉少全就話，公司自從1999年之後就冇再增加股票投資組合，而且佢自己都喺投資行業出身，對投資股票好有經驗，強調希慎未來會專注核心業務，家持有嘅股票，只係當流動資金儲備咁話。