登登登凳！又到咗《華爾街日報》公佈一年一度嘅亞洲最佳分析員頒獎禮，華華客串做住司儀！舊年個市跌到癱癱腰，搵最佳明燈就易啫，貼得中真係畀個錢你買紅棗，咁舊年最佳分析員有乜特徵呢？《華爾街日報》總結：敢沽就贏！
報道劈頭就話「好少何有股票分析員夠膽叫客人沽貨」，又話「通當沽隻股個分析員，都會被隻股管理層批評或者斷絕來往」，不過數據顯示，舊年贏嘅分析員，沽售評級佔23%，多過輸嘅分析員12%一倍，一個跌市就好似照妖鏡，睇清邊啲分析員「分銷當分析」！
Simon地區工作做到嘢
部份駐港嘅分析員都榜上有名，例如里昂分析員ScottLaprise沽比亞迪（1211），仲有同行叫沽思捷環球（330）嘅AaronFischer，分別榮膺中港最佳分析員。
不過當然唔係一面倒睇跌先贏，高盛SimonCheung睇好銀娛（027）同瑞信ColinMcCallum睇好聯通（762），仲有美銀美林嘅SunnyTam，話佢重視「地區工作」，隻方興地產（817）由9月至11月中升約六成，做咗最佳地產分析員。
壓軸戲碼係最刺激嘅券商排名！頭三位順序落係美林、瑞信同里昂，之後都係熟口熟面嘅名，但係「央行行長培植室」高盛竟然要去到14位先見到名，下次亞洲各國搵高盛舊生做財金高層麻煩in多幾輪。不過，最樣衰嘅係有「摩笛」稱號嘅大摩，竟然排第30位包尾，支摩笛走晒音，唔怪得佢哋份morningnote舊年由撮要變咗兩句，轉評級股份表又唔齊啦！啱嘅，識得藏拙係好事。
李華華
mailto:[email protected]