雖然歐智華舊年薪金、花紅同埋按表現分派獎金總共715.6萬英鎊，即係大約8900萬港銀，已經比之前一年大減，但近年風頭火勢，銀行高層每每俾人話薪酬過高，所以獅子行都已經向班股東吹定風，希望佢哋支持薪酬方案，盡量減低股東大會上被反對嘅風險。
股東會前落嘴頭
英國《每日電訊報》爆料話，滙控（005）見到巴克萊之前有成31.5%嘅股東投票反對薪酬方案之後，都有啲心慌慌，即刻去搵啲主要股東傾吓偈，叫佢哋對個薪酬方案多多支持，務求喺下星期五（25號）嘅AGM，唔好有乜冬瓜豆腐。
睇番舊年AGM，對上一年個薪酬方案有成19%反對票，最終低票數通過。至於今年，據初步了解，班股東都幾順攤幾合作。梗係啦，董事薪酬委員會主席約翰桑頓（JohnThornton），今年3月已經周圍解釋畀啲股東知，個薪酬方案係點計出嚟，中間一定落咗唔少嘴頭啦。