三色台小生「A貨弟弟」出名花心，成日背住老婆「定定」出去滾，但其實定定都要自我檢討吓，佢啲小姐脾氣臭到爆，所以A貨弟弟周時同啲老友呻，話如果唔間中出去尋吓開心，搵朋友傾吓偈降吓火，真係會谷到爆㗎。其實周時有啲贊助商送贈品去三色台畀啲藝人，博佢哋攞出嚟用當宣傳，定定份人又貪小便宜，成日都去check住自己有冇贈品，有次佢又返公司點數，發現少咗一袋，即刻懷疑畀其他藝人攞走咗，仲起勢咁打畀可疑藝人逐個問，最後先發現，原來係工作人員好心，幫佢將兩份贈品入埋一袋咋嘛，你話係咪瘀到爆呀！撰文：關仁