被中聚電池（729）攆走兼消失咗一排嘅「科學怪人」、前副主席鍾馨稼，聽講近日密謀上演「王子復仇記」，準備搞場媒體飯局爆大鑊，點知中聚識穿咗，於是先發制人，上個禮拜五公司出咗張通告，話「有人涉嫌利用中聚電池公司主席、董事或大股東」名義發放消息，誓保留追究權利。
華華上星期都收到自稱係中聚公關嘅邀請，原本飯局上星期四舉行，但之後押後到今日。點知中聚出完張通告後，今日個飯局都取消埋。據邀約方解釋，話係「唔得閒」，但就唔肯講係乜嘢人唔得閒嘞。問佢隸屬邊間公關公司時，佢就話純粹係幫朋友，唔係公關公司喎。
假借中聚之名
中聚話，鍾馨稼舊年4月已經被罷免所有職務，佢亦都完全沽晒持有嘅中聚股份同埋可換股債股。其實鍾生大可以用私人名義約飯局，點解要借中聚個名呢？